«МЕКТЕПТИН БҮТҮРҮҮЧҮ КЛАССТАРЫ, СУКТАНЫП БҮГҮН СИЛЕРДИ КАРАЙТ БААРЫ!»

23.05.2020
0

Кара-Көл шаарындагы Токтогул атындагы №1 мектеп-гимназиясында 2019-2020-окуу жылынын бүтүрүүчүлөрүнө арналган «Акыркы коңгуроо» аземи аралыкта өтсө да, агай-эжейлерди, бүтүрүүчүлөрдү кубанычка бөлөдү.

Республикабыз үчүн оор сыноо болгон быйылкы 2019-2020-окуу жылында энергетиктер шаарынын Токтогул атындагы №1 мектеп-гимназиясын 45 бүтүрүүчү аяктап жатат. Булардын ичинен үч окуучу Алтын тамга аттестатына көрсөтүлгөн.

Бул тууралуу онлайн бүтүрүү кечесинде мектеп директору Кокоева Гульбайрам эжей айтып өттү.

-Урматтуу бүтүрүүчүлөр, биз силердин алдыдагы мамлекеттик аттестацияны, ошондой эле Жалпы республикалык тестирлөөнү ийгиликтүү тапшырышыңарга тилектешпиз. Мектебибиздин эшиги силерге ар дайым ачык, — деди Гульбайрам Станбековна.

Ошентип, бүтүрүүчүлөр үчүн ары кубанычтуу, ары өкүнүчтүү күн келди. Алар он бир жыл окуган ак мектеби, бал тамган балалыгы, билим берген агай-эжейлери менен коштошкону турушат.

Бүтүрүүчүлөр акыркы коңгуроонун үнүн укканы турушат.

Коңгуроонун шыңгыр үнү аларды турмуш белесине чакырат.
Коңгуроонун үнү бүтүрүүчүлөрдүн сапары байсалдуу болушун каалайт.

Чыңгызбекова Милана, 11-класстын окуучусу:
Эми кайда биз окуган ак парталар?
Эми кайда бизди окуткан асыл жандар?
Анын баары ак мектепте калат эми,
Биз кайда? Биз учабыз кагып канат.

Бекмуратова Гүлжамал, 11-класстын окуучусу:

Алкыш айтам «А» тамгасын үйрөткөн,
Эне тилде бизди эркин сүйлөткөн.
Ачып берип турмуштун татаал жолун,
Талыкпай татыктуу билим бердиң.

Бул күнкү бүтүрүүчүлөрдү «А» тамгасын тааныткан башталгыч класстардын мугалими Абдылдаева Гүлмира эжей куттуктап, бүтүрүүчүлөргө ойлогон ой максаттарына жетүүсүн каалады.

Бүтүрүүчү 11 «а» классынын класс жетекчиси Ибраимова Чынара өзүнүн куттуктоо сөзүндө бул күн мектепти аяктап жаткан окуучулары үчүн ары өкүнүчтүү, ары кубанычын күн экенин белгиледи.
Ал эми 11″б»классынын класс жетекчиси Турдуева Айнура бүтүрүүчүлөрдүн Ата Мекендин тагдырын чече турган, Кыргыздын келечегин көтөрө турган жаштардан болушун кааларын айтты.