ЖУРНАЛИСТИКАНЫН ЖАҢЫ ТОЛКУНУ ӨЗ ЖОЛУНА ТҮШТҮ

29-май күнү Бишкек мамлекеттик университетинин журналистика факультетинде өзгөчө күн болду. Бул — студенттер үчүн жаңы этаптын башталышы, мугалимдер үчүн сыймык, университет үчүн маараке, журналистика үчүн жаңы толкун келатат.

Бул күнү университет өзүнүн 46 жылдыгын да майрамдады. Тарыхы терең, салты бекем бул окуу жай- бир нече муун журналисттерди тарбиялап, коомдун үнүн угузууга салым кошуп келген билим ордосу.

Кеченин жүрүшүндө бүтүрүүчүлөр сахнадан өз ыраазычылыгын билдирип, кээ бирлери алгачкы “түз эфирдеги” сезимин баштан кечирди. Концерттик номерлер менен коштолгон бул кечеде эмоция, кубаныч, сыймык — баары аралашып турду.

Ата-энелер, агай-эжелер, кесиптештер — баары студенттердин бүгүнкү жетишкендигине күбө болушту.

Журналист болууну каалаган ар бир адамдын жолунда биринчи устат кездешет. Бул- журналистика факультетинин мугалимдери. Алар маалыматка калыс кароо, коомго кызмат кылуу, сөздү жоопкерчилик менен колдонуу өңдүү сапаттарды ар бир студентке өз тажрыйбасы менен үйрөтөт.

Алардын сабагы — кургак лекция эмес, турмуштук мисалдар, кээде баштан өткөргөн редакциялык окуялар. Алар ар бир студенттин сапатын көрө билип, дем берип, кээде катуу сын айтып, бирок ар дайым колдоп турушту. Кечеде көптөгөн бүтүрүүчүлөр агай-эжелерге терең ыраазычылык билдиришти. Айрым мугалимдер көзүнө жаш алды. Бул — адистин кесибинен сырткары, инсандын тагдырына салым кошкон мугалимдин эмгеги.

Бишкек мамлекеттик университети — билимдин гана эмес, инсандык калыптануунун борбору. Айрыкча журналистика факультети бул багытта өзгөчө роль ойноп келет. Бул жерде эркиндик менен жоопкерчилик, чыгармачылык менен тартип бириктирилет.

Факультет студенттерге журналистиканын теориясын үйрөтүп гана тим болбостон, практикада редакциялык иштөө, иликтөө, интервью алуу, коомдук диалог жүргүзүү боюнча тажрыйба берет. Университет — жөн гана диплом берген мекеме эмес. Бул — позициясы бар адамды тарбиялаган аянтча.

Журналистиканын өзгөргөн формасы, өзгөрбөгөн өзөгү

Бүгүнкү бүтүрүүчүлөр — санарип доордун өкүлдөрү. Алар кагаздан көрө смартфонду, эфирден көрө TikTokту жакшы билет. Бирок журналистиканын өзөгү ошол бойдон калды: чындык, тактык, жоопкерчилик.

Салттуу жана жаңы форматтардын ортосундагы көпүрө азыр ушул бүтүрүүчүлөрдүн колунда. Алар фактыларды текшерүүнү, бейтараптуулукту, этикалык стандарттарды заманбап инструменттер менен айкалыштырууну үйрөнүштү. Эми алардын алдында- коомдун эң курч суроолору турат.

Ректордон— сөз, дем, ишеним

Кечеде БМУнун ректору профессор Мирлан Дылдаев да куттуктоо сөзүн сүйлөдү. Анын сөзү студенттерге багыт гана эмес, журналистикага болгон тынч, терең мамиленин үлгүсү болду. Кечеде бүтүрүүчүлөр өз сөздөрүндө медиа чөйрөсүндөгү көйгөйлөргө кайрылышты, келечектеги максаттарын бөлүштү. Бул жаңы толкун — сынга туруштук бере алган, маалыматтык бороондо багыт жоготпой турган журналист болууга умтулат.

Журналист болуу — бул кесип эмес. Бул — коомго кызмат кылуунун бир жолу. Бул- үнсүздөргө үн, караңгылыкка жарык берүү.

29-май — бул жөн гана майрам эмес, журналистиканын жаңы толкуну өз жолуна түшкөн күн болуп калды.

Рахатбек кызы Назгүл.