УЛУТТУК ПЕДАГОГИКАЛЫК ФОРУМДА ПРОФИЛДИК ОКУТУУНУН АКТУАЛДУУ МАСЕЛЕЛЕРИ ТАЛКУУЛАНДЫ

Кыргыз Республикасынын Агартуу министрлиги тарабынан уюштурулган «Доор өзгөрткөн билим: жаратман мугалим — өнүккөн өлкө» аталышындагы Улуттук педагогикалык форум ийгиликтүү жыйынтыкталды. Иш-чара өлкөнүн билим берүү тармагындагы алдыңкы тажрыйбаларды жана жаңы багыттарды талкуулоо үчүн маанилүү аянтча болуп берди.

Форумдун алкагында №5 кесиптик лицейдин директору Элеонора Ишекеева «Профилдик окутуу: окуучунун кызыгуусунан — кесиптик жана академиялык траекторияга» деген темада атайын баяндама жасады. Өз сөзүндө ал билим берүүдөгү бир катар актуалдуу маселелерди көтөрүп, катышуучулар менен ой бөлүштү. Тактап айтканда, баяндамачы профилдик окутуунун негизги максаттарына жана этаптарына токтолуп, педагогдорду даярдоо системасын өркүндөтүү зарылдыгын белгиледи. Муну менен катар, окуучуларды кесиптик-колдонмо багыттарга багыттоо, аларды келечектеги кесибин туура тандоого даярдоо жана 2026–2029-жылдарга карата пилоттук окутуу тажрыйбасын ишке ашыруу маселелери кеңири талкууланды.

Учурда №5 кесиптик лицей заманбап, сапаттуу жана атаандаштыкка жөндөмдүү билим берүү багытындагы иштерин ийгиликтүү улантып, өлкөнүн билим берүү системасын өнүктүрүүгө өзүнүн татыктуу салымын кошуп келүүдө.