УКМК: Таластагы мечиттердин жарымынан көбү тазалыкты сактабайт

Талас шаарындагы бир катар мечиттер өрт коопсуздук эрежелерине жооп бербейт. Бул тууралуу Улуттук коопсуздук мамлекеттик комитетинен билдиришти.

Маалыматка ылайык, УКМК тарабынан «Диний чөйрөдөгү мамлекеттик саясат концепциясын» ишке ашыруунун алкагында диний мекемелердин ишмердүүлүгүн текшерүү демилгеси көтөрүлүп, КР президентинин облустагы өкүлчүлүгү, Ички иштер министрлигинин, Өзгөчө кырдаалдар министрлигинин, «Кадастр» мамлекеттик мекемесинин, санитардык-эпидемиологиялык станциясынын жана облустук казыяттын өкүлдөрүнөн турган ведомстволор аралык топ түзүлгөн .

Текшерүүнүн жыйынтыгында иштеп жаткан 192 мечиттин жана намазкананын ичинен 5 мечиттин каттоодон өтпөгөндүгү, 172 мечитте өрт коопсуздук эрежелеринин сакталбаганы, ошондой эле санитардык-гигиеналык нормалардын талаптарын сактабаган 107 мечит аныкталды. 192 мечиттин 29у Дин иштери боюнча мамлекеттик комиссиянын каттоосунан өтө электиги белгилүү болду.

Текшерүүнүн жыйынтыгы менен райондук мамлекеттик администрацияларга, жергиликтүү өз алдынча башкаруу органдарына, мечит имамдарына аныкталган кемчиликтерди жоюу боюнча тапшырмалар берилди.