ШКУ: РОССИЯНЫН ЖАНА ТАЖИКСТАНДЫН ЖАШ ОКУМУШТУУЛАРЫ КЫРГЫЗСТАНГА КЕЛДИ

Бүгүн, 5-июлда, ШКУга мүчө өлкөлөрдүн жаш окумуштуулары үчүн уюштурулуп жаткан Эл аралык илимий-билим берүү лагерине Россия Федерациясынын 12 кишиден турган жана Тажикстандын 15 кишиден турган делегациясы келди.

Делегацияны «Манас» эл аралык аэропортунан Кыргыз Республикасынын Агартуу министрлигинин өкүлдөрү тосуп алышты.Лагердин жүрүшүндө делегациянын мүчөлөрү илимий жана билим берүү иш-чараларына катышып, эл аралык кызматташтыкты чыңдоого багытталган биргелешкен талкууларга жана практикалык иштерге катышат.

Белгилей кетсек, Эл аралык илимий-билим берүү лагери Кыргызстандын ШКУга төрагалыгынын алкагында Агартуу министрлиги тарабынан уюштурулууда.

Асел Кенжебек кызы, «Кут Билим»