МЕКТЕПКЕ ЖАНЫШ РУСТЕНБЕКОВДУН АТЫ ЫЙГАРЫЛДЫ

 Ысык-Ата районунун Кочкорбаев айыл аймагындагы Кеңеш жалпы билим берүү орто мектебине Жаныш Рустенбековдун аты берилди.

Билим күнүнө карата аталган мектепке кош майрам белгиленип, коомдук ишмер, экс-депутат, экс-министр Жаныш Рустенбековдун ысымы өзүнүн туулуп өткөн Кеңеш айылындагы мектепте  ыйгарылды.

Иш-чарага Ысык-Ата райондук мамлекеттик администрациясынын башчысы-аким Эрмекбай Омошев, коомдук ишмер Кемел Ашыралиев баштаган Ж.Рустенбековдун замандаш-кесиптештери, бир туугандары, айылдык кеңештин депутаттары,  айылдаштары катышты.

Рустенбеков Жаныш 1949-жылы 25-сентябрда Чүй облусунун Ысык-Ата районунун Октябрьское (азыркы Кеңеш)  айылында туулган. 1977-жылдан тартып мамлекеттик кызматта жүргөн, 1990-1994-жылдары Кыргыз ССРинин Жогорку Советинин (1993-ж. баштап Жогорку Кеңеш) 12-чакырылышынын («Легендарлуу парламент») депутаты.

1993-1994-жылдары Мамлекеттик катчы, Кыргыз Республикасынын Президентинин Администрациясынын жетекчиси, 1994-1995-жж. Кыргыз Республикасынын Президентинин алдында Мамлекеттик катчы кызматтарын аркалаган.

1995-1996-жылдары Ош облусунун губернатору болуп иштеген.

1996-2000-жж. КР Өкмөтүнө караштуу Токой чарбасы мамлекеттик агенттигинин директору кызматын ээлеген. 2000-2005-жылдары – КР Жогорку Кеңешинин Эл өкүлдөр жыйынынын депутаты, Стратегиялык өнүгүү, өнөр жай жана ишкердик комитетинин Төрагасы болсо,  2005-2007-жж. КР өзгөчө кырдаалдар министри кызматын аркалаган. 2007-2022-жж. Кыргыз Республикасынын Казакстандагы, Түркмөнстандагы жана Тажикстандагы Атайын жана Ыйгарым укуктуу элчиси кызматтарында үзүрлүү эмгектенген.

Жаныш Рустенбеков 2023-жылдын 11-июлунда 74 жаш курагында дүйнөдөн кайткан.

Гүлнара АЛЫБАЕВА, “Кут Билим”