КЫРГЫЗ ЦИРКИ ЭЛ АРАЛЫК ТАЖРЫЙБАНЫ ЖАҢЫ ПРОГРАММА МЕНЕН УЛАНТУУДА

Кыргыз мамлекеттик циркинде эл аралык фестивалдан кийинки чыгармачылык иштер жана жаңы цирк программасынын өзгөчөлүктөрү кеңири талкууга алынууда. Тажикстан Республикасында өткөн кадыр-барктуу эл аралык фестиваль кыргыз циркинин артисттери үчүн тажрыйба алмашуунун жана эл аралык маданий байланыштарды кеңейтүүнүн маанилүү аянтчасына айланды.

Маалым болгондой, аталган фестивалга дүйнөнүн 20 өлкөсүнөн цирк өнөрүнүн өкүллөрү катышып, өздөрүнүн жогорку чеберчиликтеги чыгармачылык номерлерин тартуулашты. Катышуучулар арасында кызуу таймаш жүрүп, мыкты өнөр көрсөткөн чеберлер калыстар тобунун атайын сыйлыктарына татыктуу болушту. Айта кетсек, Кыргыз мамлекеттик циркинин директору Светлана Аширова бул эл аралык фестивалдын калыстар тобунун курамында калыс катары иш алып барып, кыргыз өнөрүн татыктуу таанытты. Тажикстандын мамлекеттик циркинин расмий маалыматтарында да анын калыстар тобундагы катышы өзгөчө белгиленет.

Фестивалда топтолгон бай чыгармачылык тажрыйба бүгүнкү күндө Бишкектеги башкы цирк манежинде көрсөтүлүп жаткан жаңы программа менен үндөшүүдө. Учурда Кыргыз мамлекеттик цирки көрүүчүлөргө «Чарли жана деңиз мышыктары» аттуу таасирдүү жаңы программаны сунуштап жатат.

Жаңы программада абадагы гимнастика, акробатика, жонглёрлук жана эквилибристика сыяктуу классикалык цирк искусствосунун түрлөрү чеберчилик менен камтылган. Муну менен катар, акылдуу деңиз мышыктарынын көрсөтүүсү көрүүчүлөрдүн, өзгөчө жаш муундардын өзгөчө кызыгуусун жаратууда.

Программанын башкы каарманы — Германиядан келген белгилүү клоун Чарли. Ал манеждеги окуяларга жандуу юмор жана заманбап көңүл ачуу элементтерин кошуп, көрүүчүлөр менен түз эмоционалдык байланыш түрүндө иш алып барууда.

Белгилей кетчү жагдай, жаңы программага чет өлкөлүк белгилүү артисттердин катышуусу анын маанисин дагы да арттырууда. Алардын катарында Тажикстандан келген таланттуу катышуучу Даяна Дидко да бар. Ар башка өлкөлөрдүн артисттеринин бир манежде чогуу өнөр көрсөтүүсү цирк искусствосунун чыныгы эл аралык жана чек ара билбеген мүнөзүн даана ачып берет.

Мындай масштабдуу фестивалдар жана эл аралык чыгармачылык долбоорлор кыргыз циркинин дүйнөлүк аренадагы байланыштарын чыңдоого чоң шарт түзөт. Чет өлкөлүк кесиптештер менен биргелешкен программалар аркылуу кыргыз  көрүүчүлөрү дүйнөлүк цирк өнөрүнүн эң алдыңкы багыттары менен түздөн-түз таанышууда.

 «Чарли жана деңиз мышыктары» программасы дагы ушул прогрессивдүү багыттагы жаңы кадамдардын бири болуп саналат. Ал салттуу цирк номерлерин заманбап сахналык чечимдер жана эл аралык артисттердин жогорку чеберчилиги менен ийгиликтүү айкалыштырып жатат.

Мадина КУРБАНОВА,»Кут Билим»