КААДА-САЛТТЫ ДАҢАЗАЛАГАН НООРУЗ МАЙРАМЫ

Быйылкы Улустун улуу күнү Ош облусунун Кара-Суу районундагы  №44 Абдраман Сматов атындагы орто мектебинде өзгөчө шаң менен белгиленди.

Нооруз майрамына карата кыргыздын улуттук кийимдерин кийген окуучулар көрүүчүлөргө элибиздин салт-санаасын көрсөтүшүп, мукамдуу элдик ырлардан обон созуп, бийлеп беришти.

— Элибиз Борбор Азиядагы эң байыркы элдерден болуп эсептелет. Анын каада-салты, үрп-адаты өзүнчө бүтпөс баян. Бул күнкү майрамда биз ошол элибиздин көөнөрбөс каада-салтын окуучу жаштар билип калсын дедик, — дейт мектеп директору Урмат Атабаева.

Эми бул күнкү майрамдык иш-чараны кынтыксыз даярдаган мугалимдердин атын атап өтсөк. Алар — кыргыз тили жана адабияты мугалими Токтобаева Кулпунай, башталгыч класс мугалими Каракожоева Жыпар, музыка мугалими Турдалиева Зыйнат, башталгыч класс мугалими Замирбек кызы Нуркыз жана тарых мугалими Туркбаева Самара.

А.Алибеков, «Кут Билим»