К.КӨЛБАЕВ АТЫНДАГЫ БИШКЕК АВТОМОБИЛЬ-ЖОЛ КОЛЛЕДЖИ

К.Көлбаев атындагы Бишкек автомобиль-жол колледжи:

Кесипке карай жол ушул жерден башталат (Кесиптик билим берүүнүн бекем калыбы)

Борбордун чок ортосунда, тынымсыз кыймылга толгон көчөлөрдүн жана жолдордун арасында, жарым кылымдан ашуун убакыттан бери кесиптик билим берүүнүн чыныгы очогуна айланган К.Көлбаев атындагы Бишкек автомобиль-жол колледжи жайгашкан. Жол жана автотранспорт тармагы үчүн адистерди даярдоо максатында негизделген колледж салт менен жаңычылдыктын мыкты айкалышына айланган билим берүү борбору катары таанылган. Колледждин тарыхы 1957-жылы республикада жол жана транспорт тармагы үчүн квалификациялуу кадрларды даярдоо маселеси курч турган кезде башталат. Ошондо атайын техникум түзүү чечими кабыл алынып, ал кийинчерээк колледж макамын алган.

Ошондон бери колледж чакан билим берүү мекемесинен өлкөнүн жол-транспорт тармагынын өнүгүшүндө маанилүү ролду ойногон абройлуу түзүмгө чейин жолду басып өттү. 60 жылдан ашык убакыттан бери бул окуу жай  алгачкы иш  күндөрүнөн баштап эле практикага даяр адистерди окутуп келет.

Мыкты кесип – ийгиликтин ачкычы

Бүгүнкү күндө Бишкек автомобиль-жол колледжи эмгек рыногундагы реалдуу суроо-талап жогору болгон адистиктердин кеңири спектрин сунуш кылат. Бардык билим берүү программалары мамлекеттик аккредитациядан өткөн жана заманбап билим берүү стандарттарына жооп берет. Студенттер төмөнкү багыттар боюнча окууну тандай алышат:

1. Автомобиль транспортун техникалык тейлөө жана оңдоо
   Бул адистик автоунааларды диагностикалоо жана оңдоп-түзөө, анын ичинде кыймылдаткычтарды, трансмиссияларды жана электрондук системаларды тейлөө боюнча адистерди даярдоого багытталган. Студенттер автоунаалардын иштөө принциптерин үйрөнүп, ар кандай транспорт каражаттарын тейлөө боюнча практикалык көндүмдөрдү үйрөнүшөт.
2. Көтөрүп-ташуучу, курулуш, жол машиналарын жана жабдууларын техникалык эксплуатациялоо

Бул адистик курулуш техникалары жана жабдуулары, мисалы, экскаваторлор, крандар жана башка механизмдерди эксплуатациялоо жана тейлөө менен алектенүүчү адистерди даярдайт. Окуу теория жана практиканы камтып, оор техниканы тейлөөнү үйрөнүүгө багытталган.

3. Транспорттук электр жабдууларын жана автоматикасын эксплуатациялоо

Бул адистик транспорт каражаттарындагы электрожабдууларды жана автоматтык системаларды иштетүү менен алектенген адистерди даярдайт. Студенттер электр жана автоматтык системалардын иштөө принциптерин үйрөнүп, транспортту коопсуз жана натыйжалуу иштетүү үчүн зарыл болгон көндүмдөргө ээ болушат.

4. Транспортто ташууларды уюштуруу жана башкаруу

Бул адистик транспорттун жүк ташуусун уюштуруу жана транспорт агымдарын башкаруу менен алектенүүчү адистерди даярдайт. Студенттер логистика, автопарктар менен иштөө жана жүк ташууну башкаруу боюнча теориялык жана практикалык билимдерди алышат.

5. Логистикадагы операциялык иштер

Бул адистик логистикалык процесстерди башкаруу, анын ичинде товарларды ташуу, сактоо жана бөлүштүрүү боюнча адистерди даярдайт. Студенттер товарларды жана жүк ташууну башкаруу көндүмдөрүн үйрөнүшөт, бул көптөгөн соода жана транспорт компанияларында талап кылынат.

6. Автомобиль жолдорун жана аэродромдорду куруу жана эксплуатациялоо

Бул адистик жолдорду жана аэродром жолдорду долбоорлоого, курууга жана оңдоп-түзөөгө багытталган. Студенттер геодезияны, асфальт төгүү технологияларын жана жол конструкцияларын үйрөнүшөт, бул инфраструктуралык долбоорлордо иштөө үчүн зарыл болгон көндүмдөрдү берет.

7. Автомобиль транспортунда жол кыймылын уюштуруу жана коопсуздугу

Бул адистик жолдордо коопсуздукту камсыздоо, кыймыл схемаларын түзүү жана транспорт агымдарын башкаруу менен алектенүүчү адистерди даярдайт. Студенттер транспорт агымдарын оптималдаштыруу жана коопсуздук иш-чараларын иштеп чыгуу боюнча билимдерди алат.

8. Эсептөө техникаларынын жана компьютердик тармактардын каражаттарын техникалык тейлөө

Бул адистик эсептөө техникасын, серверлерди жана башка эсептөө жабдууларын оңдоп-түзөө жана тейлөө боюнча адистерди даярдайт. Студенттер ар түрдүү эсептөө системаларын үйрөнүп, жабдуулар менен иштөө көндүмдөрүн алышат.

9. Компьютердик системаларда программалоо

Бул адистик компьютердик тармактарды түзүү, жөндөө жана колдоо, ошондой эле алардын иштеши үчүн зарыл болгон программалык камсыздоону иштеп чыгуу менен алектенүүчү адистерди даярдайт. Студенттер тармактар менен иштөө боюнча теориялык жана практикалык билимдерди алышат.

10. Автоматташтырылган системаларды жана эсептөө техникаларын программалык камсыздоо

Бул адистик эсептөө системалары жана автоматташтырылган процесстер үчүн программалык камсыздоону иштеп чыгууга багытталган. Студенттер технологиялык комплекстердин ишин жакшыртуу үчүн программаларды иштеп чыгуу жана киргизүү боюнча көндүмдөрдү алышат.

11. Автоматташтырылган системалардын маалыматтык коопсуздугу

Бул адистик маалымат системаларын жана маалыматтарды коргоо боюнча адистерди даярдайт. Студенттер криптографиялык коргоо, киберкоопсуздук жана коопсуздук системаларын иштеп чыгуу боюнча билимдерди алышат.

12. Камсыздандыруу иши

Бул адистик камсыздандыруу негиздерин, коргоо тобокелдиктерин баалоону жана камсыздандыруу компанияларындагы иштөө ыкмаларын үйрөнүүгө багытталган. Студенттер камсыздандыруу жана финансылык чөйрөлөрдө иштөө үчүн теориялык жана практикалык көндүмдөргө ээ
болушат.

Компетенцияларды баалоо борбору: билимди тастыктоо – реалдуу мүмкүнчүлүк

2025-жылы колледждин базасында Компетенцияны баалоо борбору ишин баштады – бул ар ким өзүнүн квалификациясын же кесиптик жөндөмдөрүн тастыктай ала турган заманбап аянтча. Бул үчүн дипломдун болушу милдеттүү эмес.

Бул төмөнкү талапкерлер үчүн өзгөчө маанилүү:

1. Иш тажрыйбасы бар, бирок формалдуу билими жок адистер үчүн;
2. Категориясын жогорулатууну же разряд алууну каалаган жумушчулар үчүн;
3. Окуу жайларын аяктап, даярдык деңгээлин тастыктагылары келген бүтүрүүчүлөр үчүн.

Борбор бекитилген стандарттар боюнча жана Билим берүү жана илим министрлигинин алдындагы Көз карандысыз валидациялоо жана сертификациялоо борбору, ошондой эле тармактагы иш берүүчүлөр менен тыгыз кызматташтыкта иштейт. Натыйжалары расмий таанылат, бул жумушка орношуу, маянаны жогорулатуу жана карьералык өсүү мүмкүнчүлүктөрүн ачат.

Колледж – бул жөн гана окутуу эмес, бул кесипкөйлүктү таануу!

Материалдык-техникалык база: практика аркылуу билим берүү

Колледж өзүнүн техникалык базасы менен сыймыктанат, ал дайыма жаңыланып турат. Студенттердин карамагында:

1. Адистештирилген лабораториялар жана устаканалар;
2. Чыныгы техникалар менен камсыз болгон автопарк;
3. Кесиптик программалык камсыздоосу бар компьютердик класстар;
4. Автоунааларды диагностикалоочу жабдуулар;
5. Машиналардын техникалык системаларын үйрөнүүчү жабдуулар.

Практика билим берүү процессинде негизги орунду ээлейт. Студенттер өндүрүштүк практиканы автотейлөө ишканаларында, жол куруу ишканаларында, транспорттук компанияларда өтүшөт, ошондой эле колледждин реалдуу долбоорлоруна катышат.

Өнөктөштөр жана кызматташтык:

кесипке карай кадам

Бишкек автомобиль-жол колледжи Бишкекте гана эмес, бүткүл республика боюнча ишканалар жана уюмдар менен активдүү кызматташат. Колледждин өнөктөштөрү:

1. КР Транспорт жана коммуникациялар министрлиги;
2. Кыргызавтожол;
3. “Кыргызжолтрансдолбоор” долбоорлоо-изилдөө институту;
4. №958 жол тейлөө ишканасы
5. №25 жол тейлөө ишканасы
6. №1 жол тейлөө ишканасы
7. №39 жол тейлөө ишканасы
8. №9 жол тейлөө ишканасы
9. №7 жол тейлөө ишканасы
10. «ДТ Техник» ЖЧКсы
11. “Бишкек шаардык транспорту” муниципалдык ишканасы;
12. «Кыргыз темир жолу» ААКсы;
13. «Шоро» ЖАКсы
14. Жеке сектордогу авто тейлөөлөр жана ТТС;
15. UBS TRANSIT
16. Бишкек шаардык ИИМдин милициянын кайгуул кызмат башкармалыгы
17. КР ИИМдин милициянын кайгуул кызмат башкармалыгы
18. Эл аралык транспорттук жана логистикалык компаниялар;
19. Мамлекеттик автоунаа ишканалары;
20. “Эстокадо” автоборбору;
21. Кыргыз мамлекеттик техникалык университети, бүтүрүүчүлөрдү андан ары окутуу программасы түзүлгөн.

Колледж ошондой эле Казакстан, Россия жана Өзбекстандын окуу жайлары менен тажрыйба алмашууну камтыган эл аралык билим берүү жана техникалык долбоорлорго катышат.

Студенттердин жашоосу: Бир гана билим алуу эмес

Колледж – бул жөн гана билим алуу эмес. Бул жерде студенттик жашоо кайнап турат. Студенттер кызыгуу боюнча ийримдерге жана:

• Кесиптик чеберчилик олимпиадаларына;
• Спорттук мелдештерге;
• Волонтёрдук акцияларга;
• Маданий иш-чараларга жана концерттерге;
• Дебаттарга жана форумдарга активдүү катышат.

Күчтүү студенттик өз алдынча башкаруу системасы жаштарга өздөрүн көрсөтүүгө, командада иштөөгө, жоопкерчилик алууга жана лидер болууга жардам көрсөтөт.

2024-жылдын ноябрь айында Бишкек автожол колледжи Санкт-Петербург шаарында өткөн «Профессионалы» кесиптик чеберчилик боюнча Бүткүл россиялык чемпионаттын финалына катышты. Колледж үч негизги багыт боюнча күч сынашты: «Автомеханик», «Автомаляр» жана «Графикалык дизайн».

Колледждин студенттери бул багыттарда мыкты жыйынтыктарды көрсөтүштү:

• «Автомеханик» багытында – 3-орун;
• «Автомаляр» (боёк иштери) багытында – 2-орун;
• «Графикалык дизайн» багытында – 3-орун.

Бул жеңиштер студенттердин талыкпас эмгегинин жана жогорку деңгээлдеги даярдыгынын жемиши болуп, колледждин билим берүү сапатынын дагы бир далили болду.

Чемпионат Россиянын Билим берүү министрлиги жана Кесиптик билим берүүнү өнүктүрүү институту тарабынан уюштурулуп, 30дан ашуун компетенцияны камтыды. Бул чемпионатка катышуу колледж студенттеринин кесиптик өсүүсүндө маанилүү кадам болуп калды жана биздин билим берүү программаларынын жогорку деңгээлин дагы бир жолу тастыктады.

Бүтүрүүчү – Колледждин сыймыгы

60 жылдан ашуун тарыхында Бишкек автомобиль-жол колледжи жыйырма миңден ашуун квалификациялуу адистерди даярдады. Алардын көпчүлүгү өз тармактарында чыныгы кесипкөй болуп, Кыргызстанда гана эмес, чет өлкөлөрдө да чоң жетишкендиктерге жетишти.

Колледждин бүтүрүүчүлөрүнүн арасында ири автотранспорттук компаниялардын инженерлери, тейлөө борборлорунун жетекчилери, программалык камсыздоону иштеп чыгуучулар, эл аралык логистикалык компаниялардын кызматкерлери бар.

Алардын көпчүлүгү колледжди бүткөндөн кийин өлкөбүздөгү жана чет өлкөлөрдөгү алдыңкы жогорку окуу жайларда билим алып, ийгиликтүү дипломдук жана илимий иштерин коргоп, кийин мекенине кайтып келип, инфраструктураны, билим берүү жана экономиканы өнүктүрүүгө салым кошушкан.

Колледждин бүтүрүүчүлөрү – булар жогорку теориялык жана практикалык даярдыгы менен өзгөчөлөнгөн, эмгек рыногунда суроо-талапка ээ адистер. Жумуш берүүчүлөр биздин бүтүрүүчүлөрүбүздү заманбап өндүрүш шарттарына бат ылайыкташып кетүү жөндөмдөрүн, системалуу ой жүгүртүүлөрүн жана жоопкерчилик алуудан коркпогондуктарын дайыма белгилеп, баалап келишет.

Колледжге өзгөчө сыймык алып келген – бул жаш муундаргага билим жана тарбия берген окутуучулар жана өндүрүштүк окутуунун устаттары болгон биздин бүтүрүүчүлөр. Алар өзүнүн тажрыйбасын, билимдерин жана баалуулуктарын студенттерге өткөрүп берип, колледждин салттарын улантып, муундардын уланмалуулугун камсыз кылышууда.

Колледждеги сапаттуу билим берүү базасынын, бекем тартипке жана эмгекке тарбиялоонун аркасында колледждин бүтүрүүчүлөрү өз карьерасын ишенимдүү курушат, жеке ишканаларды ачышат, технология жана логистика тармагындагы стартаптарды ишке ашырышат, ошондой эле мамлекеттик жана жеке секторлордо татыктуу орундарды ээлешет.

Колледжге кабыл алуу: Ар бир адам үчүн мүмкүнчүлүк

Эгер сенде энергия көп болсо, техникага кызыксаң, санариптик технологиялар менен логистика сага жакын болсо же болочокто туруктуу жана келечектүү кесип алгың келсе – анда бизге кош келиңиз!

Бишкек автомобиль-жол колледжи окууга, өнүгүүгө жана кесиптик келечегин бүгүнкү күндөн баштоого даяр болгон жаштар үчүн эшигин ачат.

Биз 9- жана 11-класстын бүтүрүүчүлөрүн жогорку сапаттагы билим алууга чакырабыз. Окууга бюджеттик жана контракттык негизде тапшырууга болот. Тандоо конкурсу аттестаттын орточо баасы боюнча жүргүзүлөт жана бул боюнча маалыматты https://2020.edu.gov.kg/spuz/ сайтынан алсаңыз болот.

Бизден сен жөн гана диплом албайсың – сен чыныгы кесипке, практикалык тажрыйбага ээ болосуң. Мындан тышкары, мүмкүнчүлүктөрүңдү автоунаа тейлөөдөн баштап, программалоо жана маалыматтык коопсуздук сыяктуу ар түрдүү тармактарда ишке ашырууга шарт түзүлөт.

«Эгер келечекке ишенимдүү кадам таштагың келсе – Бишкек автомобиль-жол колледжине кел. Биз сени үйрөтөбүз, колдойбуз жана ийгиликке жетүүгө жардам беребиз!

Колледждин негиздөөчүсү К. Көлбаев айткандай: «Жолдорду машиналар эмес, аларды башкарган адамдардын жүрөгү курат». Бүгүнкү күндө колледж ошол жолду сыймык менен улантууда.