“ЭКИ ЭШИКТҮҮ ҮЙ” КИТЕБИ ТҮРК ТИЛИНДЕ ЖАРЫК КӨРДҮ

Белгилүү жазуучу Топчугүл Шайдуллаеванын “Эки эшиктүү үй” аңгемелер топтомун Түрксой уюму түрк тилинде басып чыгарды.

— Анкарада жашаган мекендешибиз, котормочу Калмамат Куламшаев которду. Султан Раев демилге көтөрүп чыгарды, ыраазычылык билдирем, — дейт жазуучу.

Топчугүл Шайдуллаеванын ар бир чыгармасында кыргыздын нукура, жасалмасыз турмуштук дүйнөсү жыттанып турат. Демек, түрк окурмандары үчүн  кыргыз турмушу менен жакындан таанышканга мүмкүнчүлүк түзүлдү.

— Ар бир адам эң алды менен Чыныгы Адам, анан барып адис болушу керек. Ошо адамдык сапатты бийик сактап, кесибин орундуу алып жүргөн, чыгармачыл, өзгөчө акылман инсаныбыз Топчугүл Шайдуллаеванын  чыгармалары Түркиядан басылып чыкты. Кыргыз тилинин сөздүк корун изилдөөгө кызыккан, кыргыз тилиндеги көөнө сөздөрдүн жоголбой жайылышына салым кошом деген лексикологдор Топчугүл Шайдуллаева эженин чыгармаларына сөзсүз кайрылуулары керек деп дайыма айтып келем. Эженин сөздүк кору — чоң казына! – деп жазып чыкты Бурулсун Бабашева.

“Жазуучу Топчугүл Шайдуллаеванын бул аңгемеси коомдогу оор темалардын бирин өтө түшүнүктүү тилде жеңил түшүндүргөнү менен жакты”, — деп ФБга бир окурманы жазды.

— Эмне үчүн уулду кыздан артык көрө берет кыргыз…? «Жок дегенде итиң эркек болсун, куурагыр!» Каармандарынын биринин бул сөзү оюмдан кетпей койду. Канчалык билими, мартабасы ашып-ташпасын, антип ойлогон адамдар арабызда көп. Бирок башкы каарман Саадат айткандай, «Оболу ургаачы иттин асылдыгын билишпейби десең…» Бул аңгемени окуп, автор Топчугүл Шайдуллаеванын кыргыз коомундагы үлкөн маселени мыкты адабий формада көтөргөнүнө ичим жылыды. Бул көп айтылышы керек. Рахмат, эже! – дейт окурманы.

Чындыгында эле эженин ар бир аңгемесин мен дагы күтүп окуйм. Анткени өтө жеңил окулат, биринчиден. Экинчиден, анын аңгемелери турмуш чындыгынан жаралган. Карапайым элдин күнүмдүк жашоо-турмушу өтө кылдат чечмеленет. Өзгөчө айылдык аялдарга көп кайрылат. Алардын тагдырын, жүрүш-турушун, мүнөзүн кошо жүргөндөй чагылдырганы мага жагат.  Албетте, ар бир чыгармасынын артында коомдогу курч социалдык маселелер көтөрүлүп, ар бир окурманды ой жүгүртүүгө чакырат.

Бар болуңуз, эже!

Гүлнара АЛЫБАЕВА, “Кут Билим”