ДУАЛДЫК ОКУТУУ: КУАУНУН СТУДЕНТТЕРИ «SONUN PRODIMPEX» ИШКАНАСЫНДА

К.И. Скрябин атындагы Кыргыз улуттук агрардык университетинин «Технология жана биоресурстар» факультетинин Тех(б)-1-23 тайпасынын студенттери Бишкектеги «Sonun Prodimpex» консерва заводунда дуалдык окутуудан өтүштү. 

Практикалык сабактар доцент К.Н. Осмоналиеванын жетекчилиги алдында «Жемиштерди жана жашылчаларды кайра иштетүү технологиясы» дисциплинасынын алкагында уюштурулду. Окуу процессинин теориялык бөлүгү кафедрада өтүлсө, практикалык бөлүгү түздөн-түз өндүрүш базасында жүргүзүлдү.

Бул завод заманбап жабдуулар жана аккредитацияланган лаборатория менен жабдылган. Ишкана тарабынан студенттерге тажрыйбалуу инженер-технолог К.Ж. Исмаилов насаатчы болуп дайындалып, анда келечектеги адистер технологиялык процесстерди терең өздөштүрүштү.

Окуу учурунда студенттер эмгекти коргоо, өндүрүштүк санитария жана тамак-аш коопсуздугунун талаптары менен таанышып, жашылча-жемиштерди кайра иштетүүнүн заманбап ыкмаларын көргөзүштү. Ишкана жетекчилиги тарабынан алар үчүн коопсуз жумуш орундары түзүлүп, атайын кийимдер жана бардык зарыл шарттар камсыздалды.

Дуалдык билим берүүнүн соңунда студенттер жана жетекчи доцент К.Н. Осмоналиева заводдун жетекчиси Ш.Д. Майлиевага жана инженер-технолог К.Ж. Исмаиловго түзүлгөн ыңгайлуу шарттар жана көрсөткөн колдоосу үчүн терең ыраазычылык билдиришти.

Мындай тыгыз кызматташтык студенттердин кесиптик компетенцияларын өнүктүрүүгө жана келечекте квалификациялуу кадр болуп калыптанышына чоң өбөлгө түзөт.

А.К., «КБ»