36 МИҢ ПЕДАГОГ САНАРИПТИК САБАТТУУЛУГУН ЖОГОРУЛАТТЫ

Мугалимдердин санариптик сабаттуулугун жакшыртуу максатында атайы курс уюштурулду. Ага жалпы 36 миң педагог катышты. Окутуунун жалпы тематикасы педагогдордун ишмердүүлүгү үчүн зарыл болгон багыттарды камтыды. Алар — маалыматтык-коммуникациялык технологиялар, Microsoft Office топтому жана интернет технологиялары.

Окуу курстун максаты — мугалимдердин санариптик сабаттуулугун жогорулатуу аркылуу билим берүү процессинде маалыматтык-коммуникациялык технологияларды натыйжалуу пайдалануу.

Курс ошондой эле медиа жана маалыматтык сабаттуулукту, санариптик жарандыктын принциптерин, ошондой эле МКТны окутууну пландаштыруу жана баалоого интеграциялоо маселелерин камтыды. Педагогдор берилген материалдарды жана онлайн окуу ресурстарынын шилтемелерин өз алдынча колдонуу менен санариптик көндүмдөрүн өнүктүрүүгө мүмкүнчүлүк алышты.

Педагогдор окутууда компьютер менен иштөөнүн негизги көндүмдөрүн, сабактарда Интернетти колдонууну, окуу материалдары менен өз алдынча иштөөнү, Microsoft Wordдо документтерди түзүү жана редакциялоону, презентацияларды түзүү, Google-продуктыларын (Google Forms, Google Classroom, Google Meet) билим берүү процессине интеграциялоону үйрөнө алышты.

Мугалимдер алган билимдерин сабактын планын иштеп чыгууга, санариптик контентти түзүүгө, онлайн платформалар аркылуу окуучулар менен өз ара аракеттенүүгө жана санариптик чөйрөдө маалымат алмашууга колдоно алышат. Бул билим берүүнүн сапатын жакшыртууга шарт жаратуу менен Кыргызстандын мектептеринде МКТны өнүктүрүүгө өбөлгө түзөт.

Окутуу Билим берүү жана илим министрлиги Дүйнөлүк банктын каржылык колдоосу менен ишке ашырып жаткан «Келечек үчүн билим берүү» долбоорунун алкагында пилоттук 1200 мектептин мугалимдерине 2023-2024-жылдары өткөрүлдү.

Бардык мугалимдер Педагогикалык кызматкерлердин квалификациясын жогорулатуу жана кайра даярдоо республикалык институтунда квалификациясын жогорулатуунун алкагында бул курстан өтүп, сертификат ала алышат.