19 жаштагы футболчу Ааламбек Абылкасымов жол кырсыгынан каза болду

Кыргызстандын 16 жашка чейинки жаштар курамасынын, «Илбирс» жана «Абдыш-Ата» футболдук клубдарынын экс-чабуулчусу 19 жаштагы Ааламбек Абылкасымов мезгилсиз дүйнө салды. Бул тууралуу Кыргыз футбол союзунан билдиришти.

Маалыматка ылайык, ал каргашалуу жол кырсыгынан каза болду.

Белгиленгендей, Ааламбек Абылкасымов 2019-жылы U-16 Азия Кубогунун тандоо оюндарында Ливандын курама командасынын дарбазасына 41-мүнөттө алмаштыруу менен чыгып, 2 гол киргизип, 0:2 эсебинде улуттук курама команданын жеңишин камсыздаган эле.

Футболчу «Илбирстин» курамында 2021-жылдын 16-мартында Премьер-Лигада дебют жасаган. Жалпысынан ал 12 оюн өткөрүп, 2 гол киргизип, 1 пас берген. 2023-жылы «Абдыш-Ата-2» клубунда ойноп жүргөн.