“ДИЛГИР” СЫНАГЫ: ЖЕҢҮҮЧҮЛӨР АНЫКТАЛДЫ

Борбор калаада жалпы билим берүү уюмдарынын 7–11-класстарынын чыгармачыл окуучулары арасында уюштурулган «Дилгир» сынагынын шаардык этабы өттү.

Иш-чаранын негизги максаты — улуттук баалуулуктарды, руханий мурастарды, маданий жана тарыхый салттарды жайылтуу, таланттуу окуучуларды колдоо, ошондой эле алардын көркөм окуу чеберчилигин өнүктүрүү болуп саналат.

Сынактын шаардык баскычына райондук этаптарда I жана II орундарды ээлеген 8 мектептин окуучулары катышып, өз чеберчиликтерин көрсөтүштү. Катышуучулардын өнөрүн Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиянын кызматкери Кутмырза Жакыбалиев баш болгон калыстар тобу баалады.

Сынактын жыйынтыгы боюнча жеңүүчү деп табылгандар:

• I орун — № 78 мектептин окуучусу Каныбекова Розалина;

• II орун — № 103 мектептин окуучусу Сүйүнбаева Назбийке;

• III орун — № 67 мектептин окуучусу Бейшекеев Кадырлуу жана № 55 мектептин окуучусу Автандилов Ариет.

Мындай сынактар өсүп келе жаткан муундун эне тилине болгон урмат-сыйын арттырып, руханий мурастарды сактоого жана окуучулардын чыгармачылык дараметин ачууга чоң өбөлгө түзөрү белгиленди.

А.К., «КБ»