ЗАМАНБАП ТУРМУШ ЖАНА ТЕХНОЛОГИЯ

Жасалма интеллект жана заманбап технологиялар өнүккөн доордо, жаш муунду турмушка ар тараптан даярдоо өзгөчө маанилүү. Бул үчүн мектеп программасына салттуу «үй чарба жумуштары» сабагын «Заманбап турмуш жана технология» деген жаңы форматта киргизүү керек. Бул сабак кыздарга да, балдарга да бирдей окутулуп, аларды күнүмдүк турмуштун бардык тармактарына даярдайт.
Программанын негизги багыттары төмөнкүлөр болуусу зарыл.
Биринчиден, финансылык сабаттуулук жана үй бюджетин башкаруу. Окуучулар жеке чыгымдарды пландоону, эсеп-чотторду төлөөнү, киреше жана чыгашаны эсептегенди, ошондой эле банктык кызматтарды коопсуз колдонууну үйрөнүшү керек. Бул санариптик доордогу эң негизги көндүмдөрдүн бири.
Экинчиден, тамактануу маданияты жана тамак жасоо. Жасалма интеллект тамактын рецептин таап бериши мүмкүн, бирок аны даярдоо үчүн практикалык көндүмдөр талап кылынат. Окуучулар азык-түлүктү туура тандоону, сактоону, гигиена эрежелерин сактоону жана пайдалуу, арзан тамактарды тез даярдоону үйрөнүшү абзел. Бул алардын ден соолугуна жана бюджетти үнөмдөөгө түз таасирин тийгизет.
Үчүнчүдөн, үй-бүлөлүк тиричилик жана техниканы колдонуу. Ар бир адам үйүндөгү тиричилик техникаларын (кир жуугуч машина, микротолкундуу меш ж.б.) коопсуз башкара билиши жана майда оңдоо иштерин (мисалы, баскыч бекитүү, крандан суу акканын оңдоо) жасай алышы керек. Бул аларды башкаларга көз карандысыз кылат.
Төртүнчүдөн, экологиялык жоопкерчилик жана туруктуулук. Окуучуларды таштандыны сорттоого, ресурстарды үнөмдөөгө жана экологиялык таза адаттарды калыптандырууга үйрөтүү зарыл. Бул глобалдык көйгөйлөргө жарандык жоопкерчиликти калыптандырат.
Жыйынтыктап айтканда, бул программа окуучуларга жашоонун практикалык көндүмдөрүн берип, аларды келечектеги ар кандай кырдаалдарга даяр жана ишенимдүү кылууга багытталышы керек.

Дамира Жумабаева