«ЗОЛОТАЯ КОРОНА» КЫРГЫЗЧА «АЛТЫН ШӨКҮЛӨ»

  • 17.12.2021
  • 0

Ушундай аталыштагы бала бакчанын  Кашкар-Кыштак айылында ачылып иштей баштаганына быйыл беш жылдын жүзү болду.

"ЗОЛОТАЯ КОРОНА" КЫРГЫЗЧА "АЛТЫН ШӨКҮЛӨ"

Кашкар-Кыштак айылы Кара-Суу районундагы көп улуттуу конуштардын бири болуп саналат. Мында өзбек, кыргыз, уйгур, түрк, тажиктер «бир жеңден кол, бир жакадан баш чыгарып» ынтымактуу жашап келишет. Айылда калктын саны жылдан-жылга өсүүдө. Мектепке чейинки билим берүү мекемелери жетиштүү эмес. 2015-жылы элдин талабы менен айылда «Золотая корона» менчик бала бакчасы ачылат. Айрым үй-бүлөлөрдөн үч-төрттөн бала бакчага келгендиктен ата-энелер үч мин сомдон төлөп берүүдө кыйналышат.

— Ата-энелер үч миң сомдон төлөп берүүдө кыйналышканын көрүп, айыл өкмөтүнө кайрылдык. Ал жердегилер биздин көйгөйдү туура түшүнүп, бала бакчаны айыл өкмөтүнүн балансына өткөрүштү. Ошондон бери талыкпай иштеп келе жатабыз, — дейт мектепке чейинки билим берүү мекемесинин жетекчиси Мамырова Асипа.

Мамырова Асипа билим берүү тармагында кырк жылдан бери үзгүлтүксүз эмгек өтөп келүүдө. Ал – Билим берүүнүн мыктысы. Ак эмгеги татыктуу бааланып, бир топ грамоталар менен сыйланган. Асипа Абдылдаевнанын нукура лидерлик сапаты, уюштуруучулук жөндөмү ушул билим берүү мекемесин түптөөдө байкалды. Бала бакчаны ачыш үчүн жалпы эл менен, бийлик өкүлдөрү менен, жергиликтүү кеңештин депутаттары менен сүйлөшүп, тил табышты. Демөөрчүлөрдү тартты. Ар бир жакшы иштин акыбети кайтат эмеспи, азыркы тапта “Золотая корона” бала бакчасындагы алты тайпада 180 наристе билим-тарбия алууда. Бала бакчанын ачылышы менен айылдагы 25 киши жумуш менен камсыз болду. Булардын ичиндеги алты тарбиячы менен алты жардамчы тарбиячынын баары  жогорку билимге ээ.

"ЗОЛОТАЯ КОРОНА" КЫРГЫЗЧА "АЛТЫН ШӨКҮЛӨ"

—              Бул бала бакчаны түптөөдө өтө көп кыйынчылыктар болду. Элдин талабы да көп болду. Бизге  менин бир туугандарым демөөрчүлүк кылып, чоң жардам беришти. Анткени биздин ата-энебиз да мугалим болушкан. Ата-энебиздин таалимин алып жетилдик. Билимге жакын өстүк. Бир туугандарымдын бири да агартуу ишинен жардамын аябайт. Бул бакчаны түптөөдө Алайда кыргыз тили жана адабияты мугалими болуп эмгектенген бир тууган агам Сыдык Мамыров зор салым кошту, — дейт Асипа Абдылдаевна.

А.Алибеков, «Кут Билим»                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                   

Бөлүшүү

Комментарийлер