МЫКТЫ МЕКТЕП ТАНДООСУНА КАТЫШКАНДАРДЫН ТИЗМЕСИ

 Билим берүү жана илим министрлигинин “Кыргыз Республикасынын мыкты мектебин тандоо жөнүндө” 2024-жылдын 1-февралындагы буйругуна ылайык, республика боюнча 121 мектеп катышууда.

Башкы максат — тандоого катышкан  мыкты мамлекеттик жана муниципалдык жалпы билим берүү уюмдарынын новатордук ыкмалары, жаңы муундагы окуу-методикалык комплекстери, анын  ичинде электрондук билим берүү ресурстарын колдонууда ийгиликтүү тажрыйбасы бар, профилдик жана автордук программаларды ишке ашырган, инсанга багытталган окутууну өздөштүргөн видеопрезентациялары аркылуу коомчулукка жарыялоону көздөйт.

Билим берүү жана илим министрлигинин Мектеп жана мектептен тышкаркы кошумча билим берүү башкармалыгынын башкы адиси Салтанат Өмүрканованын  айтымында, өткөн жылы 2022-жылдын жыйынтыгы менен  мыкты мектеп аныкталган болчу.

— Билим берүү  жана илим министрлигинин демилгеси менен 2023-жылы «Кыргыз Республикасынын Мыкты мектеби тандоосу» биринчи жолу өткөрүлгөн. Тандоого республикадан жалпы 26 мектеп катышкан болсо, 2024-жылда кайрадан иштелип чыккан «Кыргыз Республикасынын Мыкты мектебин тандоо жөнүндө» жобосунун алкагында 121 мектеп катышууда. Айрым учурларда жалпы билим берүү уюмдарында жасалып жаткан эбегейсиз иш-чаралар, билим берүү системасындагы жаңылыктар, инновациялар бир гана мектеп, аймактан сыртка чыкпай көмүскөдө калып кетүүдө, — дейт башкы адис.

2024-жылдын  алкагында өткөрүлүп жаткан тандоого катышкан жалпы билим берүү уюмдарынын видеопрезентациялары “Инновациялык билим берүү — өнүгүүнүн фактору” (“Инновационное образование  — фактор развития”), “Заманбап мектеп – заманбап окуучу (Soft skills)” (“Современная школа – современный выпускник (Soft skills)” темаларынын алкагында 10 минутадан — 20 минутага чейин MP4 форматында даярдап, министрликке жөнөтүштү.

Тандоого катышкан жалпы билим берүү уюмдарынын директорлору видеопрезентацияларын 2024-жылдын 1-апрелинен 10-апрелине чейин Билим берүү жана илим министрлигинин Маалыматтык саясат бөлүмү менен  биргеликте социалдык тармактарга жана билим берүү ресурстарына жайылтуу боюнча иш алып барышууда. Бирок, бул мөөнөттөн кийин дагы айрым жетекчилер видеопрезентацияларын жүктөгөнүн эске алып, уюштуруу комитети жүктөө мөөнөтүн узартышты.

—  Быйылкы тандоонун жыйынтыгын чыгаруу Кара-Кыргыз автономиялуу облусунун 100 жылдыгы менен шайкеш келгендигине байланыштуу, анын алкагында жалпы билим берүү уюмдарына колдоо көрсөтүү марафонун уюштуруп, республиканын мыкты инсандарынан колдоо күтмөкчүбүз. Ар бирибиздин экинчи үйүбүз — мектеп эмеспи, ошондуктан билим берүү системасына кайдыгер карабаган инсандардын, демөөрчүлөрдүн колдоосу болот деген үмүттөбүз, — дейт Салтанат Темирбековна.

Бул жакшы идея бардык социалдык тармактарда жайылтылып, билим берүү тармагына кайдигер карабаган атуулдар, жетекчилер комментарийлерин жазып, министрликке кош колдоп алкышын айтып жаткандар четтен чыгат. Алсак, Ош облусунун Өзгөн районуна караштуу Ж. Маматжанов орто мектебинин директору Тойкулова Мерикандын  пикирине көз чаптыралы:[09:55, 25.04.2024]  «Саламатсыздарбы, кутман кеч баарыңыздарга. Бул конкурс биздин жааматка да жакты. Ар бир мектептин ар кандай ийгиликтери менен таанышып, өзүбүзгө жакшы жактарын алып, жамаатта талкуулап жатабыз. Экинчиден, биздин мурунку бүтүп кеткен бүтүрүүчүлөрүбүз биздин жасап жаткан ийгиликтерибиз менен таанышып, агай, эжекелерине ыраазычылык билдиришүүдө. Жалпыңыздарга ийгиликтерди каалайм. Ал эми уюштуруучуларга жааматыбыздын атынан ыраазычылык билдирем».

Ош облусунун Ноокат районунун А.Мамыров орто мектебинин директору Санахат Айтматова: «Жакшы жагы мектепте болуп жаткан ийгиликтер менен ата-энелер да таанышып, бизге ыраазычылык билдирип жатышат».

Ал эми Орозбек уулу Эламан Курманжан Датка атындагы №8 орто мектептин директорунун орун басары:

«Негизи конкурс мага жакты такыр мектепти эстебеген окуучуларым, жада калса чет өлкөдөгү окуучуларым менен байланыш болду, ата-энелер тим эле күндө чалышат «биз колдодук, лайк  бастык» деп шылтоо менен жакшы мамилелер жаралды. Конкурстун максаты — жарышуу эмес, ата-эне, мурунку бир бүтүрүүчүлөр мектепке көңүл буруусу, өздөрүнүн 30 жыл мурунку учурун эстешип, дээрлик мага жакты».
Эң башкысы өлкөнүн булуң-бурчундагы тандоого катышып жаткан мектептердин өнүгүшүнө, анда окуган окуучулардын сапаттуу билим алуусуна кош көңүл карабаган колунда бар атуулдар, ишкерлер, кайсы бир учурда мектепте окуган бүтүрүүчүлөр колдоо көрсөтөт деген чоң ишеним бар. Анда эмесе, ар бир айылдагы, райондогу, шаардагы мектептерге салым кошконду унутпайлы!

Тандоого катышып жаткан мектептердин тизмеси тиркелет.

Гүлнара АЛЫБАЕВА, “Кут Билим”

Тиркеме

КР БИМнын

2024-жылдын “____”________

№ _________ буйругу менен бекитилди

Кыргыз Республикасынын мыкты мектебин тандоосуна катышуучу жалпы билим берүү уюмдарынын тизмеси

121.     Чкалов атындагы мектеп-               Нарын шаары                                Мукашов Рахат

гимназиясы