МАНАС ШААРЫ: ЖАҢЫ МЕКТЕП ЭШИГИН АЧТЫ

Манас шаарына караштуу Дөмөр айылында №24 жалпы билим берүү орто мектеби пайдаланууга берилди. Жаңы билим очогунун ачылыш аземине Кыргыз Республикасынын Министрлер Кабинетинин Төрагасы — Президентинин Администрациясынын жетекчиси Адылбек Касымалиев онлайн форматта катышты. 

Республикалык бюджеттин эсебинен каржыланган бул долбоордун жалпы сметалык баасы 158 миллион сомду түздү. Курулуш иштери 2025-жылдын апрель айында башталып, белгиленген мөөнөттө толук аяктады. Аткарылган иштердин сапаты жана курулуш эрежелеринин талаптарга шайкештиги Курулуш министрлигине караштуу тиешелүү департаменттер тарабынан тыкыр көзөмөлгө алынды.

Архитектуралык долбоорго ылайык, 275 орунга ылайыкталган жаңы мектеп эки кабаттан турат жана анын жалпы аянты 2980 чарчы метрди түзөт. Имаратта жарык, кенен окуу кабинеттеринен тышкары, окуучулардын кол өнөрчүлүгүн жана кесипке багытын өнүктүрүүчү заманбап эмгек класстары, талапка жооп берген ашкана, китепкана, жыйындар залы жана спорт залы толук жабдылган.

Жаңы мектеп айыл жериндеги жаш муундардын заманбап талаптарга ылайык татыктуу билим жана тарбия алуусуна кеңири шарт түзүп, аймактагы билим берүү сапатын жогорулатууга олуттуу салым кошот.

А.К., «КБ»