КОРРУПЦИЯСЫЗ МЕКТЕП: БИШКЕКТЕ ТАРБИЯ ИШТЕРИ БОЮНЧА ДИРЕКТОРДУН ОРУН БАСАРЛАРЫ МЕНЕН КЕҢЕШМЕ ӨТТҮ

Бүгүн, 10-июнда Бишкек шаарындагы №68 жалпы билим берүү мектеп-гимназиясынын базасында борбор калаадагы мектептердин директорлорунун тарбия иштери боюнча орун басарлары үчүн маанилүү кеңешме болуп өттү. Иш-чара билим берүү тармагындагы коррупциялык көрүнүштөрдүн алдын алуу жана жетекчи кызматкерлердин укуктук сабаттуулугун жогорулатуу максатын көздөйт.

Жыйынга укук коргоо органдарынын өкүлдөрү катышып, агартуучулар арасында коррупцияга каршы күрөшүү жана анын алдын алуу маселелери боюнча кеңири түшүндүрүү иштерин жүргүзүштү.

Жолугушуунун жүрүшүндө төмөнкүдөй негизги маселелер талкууга алынды:

• Мыйзамсыз акча чогултуулар: Өзгөчө балдарды мектепке кабыл алуу учурундагы мыйзамсыз каржылык аракеттерге, ошондой эле бүтүрүүчүлөр менен ата-энелер тарабынан «мугалимдерге ыраазычылык билдирүү» шылтоосу менен акча жыйноо көрүнүштөрүнө бөгөт коюу маселеси курч коюлду.
• Укуктук жоопкерчилик: Катышуучуларга учурда укук коргоо органдарынын өндүрүшүндө турган конкреттүү иштер тууралуу маалымат берилип, коррупциялык укук бузуулардын кесепеттери эскертилди.
• Ачык-айкындуулук: Билим берүү уюмдарынын ишмердүүлүгүндө ачык-айкындуулук жана айкындык принциптерин камсыз кылуу зарылдыгы белгиленди.

Маанилүү эскертүү: Бишкек шаарынын мэриясынын Билим берүү департаменти коррупциялык укук бузуулардын алдын алуу, билим берүү кызматкерлеринин укуктук маданиятын жогорулатуу жана жарандардын сапаттуу билим алууга тең мүмкүнчүлүгүн камсыз кылуу боюнча системалуу иштерди мындан ары да чечкиндүү улантарын билдирет.