ҮЧ МАМЛЕКЕТТИК УНИВЕРСИТЕТ КЫРГЫЗ УЛУТТУК УНИВЕРСИТЕТИНЕ КОШУЛДУ

Президент Садыр Жапаровдун жарлыгы менен үч облустук мамлекеттик жогорку окуу жайы – Нарын, Талас жана Баткен мамлекеттик университеттери – Жусуп Баласагын атындагы Кыргыз улуттук университетине кошулуу жолу менен реорганизацияланды.

Жарлыкка ылайык, Министрлер Кабинетине тиешелүү чечимдерин ушул өзгөртүүлөргө ылайык келтирүү тапшырылды.

Маалыматка таянсак, Кыргыз улуттук университети (КУУ) 1925-жылы негизделген жана учурда 75тен ашык багыт боюнча бакалавриат, магистратура жана адистик программаларды сунуш кылган өлкөдөгү ири жогорку окуу жайы болуп эсептелет.

Кошулган университеттер тууралуу кыскача маалымат:

• Нарын мамлекеттик университети 1996-жылы түзүлгөн. Ал төрт окуу жайдын: Айыл чарба техникумунун, Педагогикалык колледждин, Мугалимдердин квалификациясын жогорулатуу институтунун жана Кыргыз архитектура-курулуш институтунун филиалынын базасында негизделген.
• Талас мамлекеттик университети 1994-жылы, 1930-жылдардан бери иштеп келген педагогикалык окуу жайдын базасында уюшулган.
• Баткен мамлекеттик университети (БатМУ) 1999-жылы түзүлгөн.

Бул чечим билим берүү системасын оптималдаштыруу жана жогорку билимдин сапатын жакшыртуу максатын көздөйт.

Г.А., “КБ”