БАШТАЛГЫЧ ЖАНА ОРТО БИЛИМ БЕРҮҮ ОКУУ ЖАЙЛАРЫ ЭМЕРЕКТЕР МЕНЕН КАМСЫЗ БОЛДУ

Билим берүү жана илим министрлиги тарабынан Азия Өнүктүрүү Банкынын колдоосу менен ишке ашырылып жаткан «Секторду өнүктүрүү программасы: Инклюзивдүү өсүү үчүн көндүмдөр» долбоорунун алкагында Жалал-Абад облусунун колледждери жана кесиптик лицейлери окуу эмеректери менен камсыз болду.

Маалыматка ылайык, Базар-Коргон шаарындагы №63 кесиптик лицейге (КЛ) жалпысынан 553 930 сомго эмерек (парталар, окуу стулдары, доскалар, шкафтар, илгичтер) коюлган. Майлуу-Суу шаарындагы №76 КЛге 970 840 сом суммасына эмерек (конференц-зал үчүн стол жана стулдар, парталар, окуу стулдары, доскалар, шкафтар, илгичтер) жеткирилип берилди. Ушундай эле эмеректер менен Жалал-Абад мамлекеттик университетинин Майлуу-Суу колледжи 1 376 280 сомго, Кара-Көл колледжи 2 547 230 сомго жана Кербен шаарындагы № 69 КЛ 553 932 сомго жабдылган. Бардык эмеректер сапаттуу, коопсуз материалдан жасалган.

Белгилей кетсек, аталган окуу жайларда буга чейин «Секторду өнүктүрүү программасы: Инклюзивдүү өсүү көндүмдөрү» долбоорунун алкагында оңдоп-түзөө иштери жүргүзүлгөн жана алар кеңсе жабдуулары менен камсыз болгон.

Гүлнара АЛЫБАЕВА, “Кут Билим”