«БАЛАГА СҮЙҮНЧҮ» ЭМИ «ТҮНДҮК» ТИРКЕМЕСИ АРКЫЛУУ ЖЕТКИЛИКТҮҮ

«Түндүк» мобилдик тиркемесинде «Балага сүйүнчү» мамлекеттик жөлөкпулун тариздөө боюнча жаңы электрондук кызмат ишке киргизилди. Бул тууралуу Кыргыз Республикасынын Эмгек, социалдык камсыздоо жана миграция министрлиги билдирди.

Эми ата-энелер жөлөкпул алуу үчүн арызды телефон аркылуу бере алат. Бул жаңы кызмат Социалдык камсыздоонун бирдиктүү тутумуна тиешелүү модулду киргизүүнүн алкагында ишке ашырылды. Бала төрөлгөнү ЖААК органдарында катталгандан кийин ата-энелер санариптик сервис аркылуу жөлөкпул алууга арыз бере алышат.

Электрондук форматты киргизүүнүн негизги максаты — жөлөкпулду тариздөө жол-жобосун жөнөкөйлөтүү, административдик тоскоолдуктарды азайтуу жана жаңы төрөлгөн балдары бар үй-бүлөлөр үчүн мамлекеттик колдоонун жеткиликтүүлүгүн жогорулатуу.

Ошол эле учурда жөлөкпулду КТБлар (Калкты тейлөө борборлору)  аркылуу салттуу тартипте тариздөө мүмкүнчүлүгү да сакталып калат. Жарандар өздөрүнө эң ыңгайлуу болгон жолду — электрондук же жеке кайрылуу форматын өз алдынча тандай алышат.

А.К., «КБ»