ЖРТ КИМДИН КОЛУНДА?

  • 19.11.2026

Жыл сайын он миңдеген бүтүрүүчүнүн жогорку билим алууга болгон мүмкүнчүлүгүн аныктаган Жалпы республикалык тестирлөөнү мамлекет эмне үчүн өзү өткөрбөйт? Бул суроо 2026-жылдын 11-ноябрында Жогорку Кеңеште көтөрүлүп, чейрек кылымдан бери иштеп келген системанын айланасында жаңы талкуу жаратты. Тестирлөөнү өткөргөн борбор мамлекеттик мекеме эмес. Бирок ал мамлекеттин чечими менен, мамлекеттик конкурс аркылуу тандалат. Анда ким кимге жооп берет? ЖРТнын суроолорун башка уюмдар түзө алабы? Абитуриенттер төлөгөн каражат кайда жумшалат? Маселенин чоо-жайын расмий документтер менен статистиканын негизинде талдап көрдүк.

Миңдеген бүтүрүүчү үчүн ЖРТнын жыйынтыгы жөн гана сертификаттагы упай эмес. Ал — мамлекеттик грантка жетүүнүн, тандаган кесибине ээ болуунун, университетке өтүүнүн жолу. Айрымдары үчүн бул сынак чоң шаарга барып билим алууга, үй-бүлөсүнүн турмушун өзгөртүүгө мүмкүнчүлүк ачат.

Ошол мүмкүнчүлүктүн канчалык адилеттүү бөлүштүрүлүп жатканын ким текшерет?

Көпчүлүк ЖРТны мамлекеттик сынак катары кабыл алат. Анткени тесттин жыйынтыгы мамлекеттик билим берүү гранттарын бөлүштүрүүдө колдонулат, тестирлөөнүн эрежелери мамлекеттик ченемдик актыларга таянат. Бирок аны түздөн-түз мамлекеттик орган өткөрбөйт.

Кыргызстанда ЖРТны Билимди баалоо жана окутуу усулдары борбору — орусча кыскартылган аталышы менен ЦООМО уюштуруп келет. Ал мамлекеттик мекеме эмес, коммерциялык эмес уюм.

Ушул жөнөкөй көрүнгөн айырмачылык азыр чоң талкууга себеп болууда.

Парламентте айтылган доомат

ЖРТ КИМДИН КОЛУНДА?2026-жылдын 11-ноябрында Жогорку Кеңештин жыйынында депутат Камила Талиева ЖРТнын уюштурулушун сынга алды. Ал тестирлөөнү көп жылдан бери мамлекеттик эмес уюм өткөрүп жатканын белгилеп, мамлекеттик көзөмөл, жоопкерчилик жана каржылык ачыктык маселелерин көтөрдү.

Депутаттын билдирүүсүндө 2026-жылдагы сертификаттарда жана тесттик тапшырмаларда каталар кеткени, абитуриенттер менен ата-энелерге маалымат жеткирүү жетишсиз болгону айтылды. Ошондой эле тесттик материалдардын мектеп программаларына шайкештигин текшерүүнү күчөтүү сунушталды.

Талиева ЖРТ системасын өзгөртүү үчүн «Билим берүү жөнүндө» мыйзамга тиешелүү түзөтүүлөрдү киргизүү керек деген пикирди да билдирди.

Бир караганда депутаттын суроосуна жооп жөнөкөйдөй сезилет: эгер тестирлөө мамлекеттик маанидеги иш болсо, аны мамлекет өзү жүргүзсүн. Бирок маселе жөнөкөй көрүнгөнү менен оңой эле чечилбейт.

ЖРТны түздөн-түз мамлекеттик органга өткөрүп берүү анын адилеттүүлүгүн сөзсүз күчөтөбү? Же, тескерисинче, мурда жоюуга аракет жасалган коррупциялык тобокелдиктерди кайра пайда кылабы?

Бул эки суроонун тең жүйөсү бар.

ЦООМО мамлекетке карабайт. Бирок аны мамлекет тандайт

ЖРТнын укуктук негизин караганда кызыктуу жагдай чыгат.

Министрлер Кабинетинин 2022-жылдын 30-июнундагы №355 токтому менен абитуриенттерди жалпы республикалык тестирлөө жөнүндө жобо бекитилген. Тестирлөөнү уюштурууда көз карандысыз тест кызматынын иштеши ушул ченемдик негизге таянат.

Ал эми Илим, жогорку билим берүү жана инновациялар министрлиги 2025-жылдын 21-ноябрында 2026–2028-жылдар үчүн тест кызматына коюлган талаптарды жарыялаган. Документте ЖРТны билим берүү тармагында көз карандысыз баалоого адистешкен, мамлекеттик эмес уюм өткөрүшү керектиги түз жазылган.

Бул эмнени билдирет?

Мамлекет ЖРТны өзүнүн түзүмдөрүнүн бири аркылуу өткөрүүнү эмес, атайын тандалган көз карандысыз уюмга тапшыруу моделин колдонуп жатат. Башкача айтканда, ЦООМОнун мамлекеттик эмес макамы системадагы кокустук эмес. Ал конкурстук талаптарга шайкеш келет.

2026-жылдын 12-январында жарыяланган маалыматка ылайык, министрлик конкурстук материалдарды карап чыгып, ЦООМОну 2026–2028-жылдары ЖРТны өткөрө турган көз карандысыз тест кызматы катары аныктаган.

Бирок ушул жерден жаңы суроо жаралат: эгер конкурс болсо, ага кимдер катышкан?

ЦООМО көп жылдан бери өлкөдөгү негизги республикалык тестти өткөрүп келет. Уюмдун тажрыйбасы, адистери жана калыптанган инфраструктурасы бар экени талашсыз. Бирок бир мекеменин узак убакыт бою тандалышы өзүнөн өзү атаандаштык болгонун да, болбогонун да далилдебейт.

Бул үчүн конкурстун протоколун, талапкерлердин санын, аларга коюлган шарттарды жана баалоо жыйынтыктарын көрүү керек.

Борборду монополист деп атаардан мурда анын укуктук жана экономикалык негизин тактап алуу зарыл. Мыйзамдуу конкурста жеңишке жеткен уюм менен атаандаштыкты мыйзамсыз чектеген уюмдун ортосунда чоң айырма бар.

Тестти түзүү бир гана ЦООМОнун колунан келеби?

Маселенин эң талаштуу жери ушул.

Кыргызстанда мектеп программаларын иштеп чыккан педагогдор, предметтик окумуштуулар, университеттер, билим берүүнүн сапатын баалоо менен иштеген мамлекеттик адистер бар. Анда эмне үчүн ЖРТнын тесттик тапшырмаларын башка мекемелер түзө албайт?

Чынында, түзө алышат. Бирок муну так түшүнүү керек.

2026-жылдын 19-мартында Агартуу министрлиги ЖРТга даярдануу үчүн «Булак» аттуу акысыз мобилдик тиркемени ишке киргизгенин жарыялады. Анын тапшырмаларын даярдоодо мурунку жылдардагы тесттик материалдар колдонулуп, окшош суроолор жасалма интеллекттин жардамы менен да иштелип чыккан.

7-апрелде министрлик тиркемеде 12,5 миңден ашык тесттик суроо бар экенин, катталган окуучулардын саны 61 миңден ашканын билдирди. Ошол күнгө карата колдонуучулар 377 миң тест аткарышкан.

ЖРТ КИМДИН КОЛУНДА?Ал эми Агартуу министри Догдуркүл Кендирбаева 23-июлда берген маегинде “Булак” тиркемеси аркылуу 94 миңден ашуун окуучу ЖРТга акысыз даярданганын билдирген.

Бул мисал тесттик тапшырмаларды иштеп чыгуу бир гана уюмдун иши болушу шарт эмес экенин көрсөтөт.

Бирок дагы бир айырмачылык бар. Даярдык үчүн түзүлгөн суроо менен жогорку окуу жайга кабыл алууда колдонулган расмий тесттик тапшырманын талаптары бирдей эмес.

Расмий тестте суроонун тууралыгы гана эмес, анын канчалык татаал экени, билим деңгээли ар башка окуучуларды айырмалоо жөндөмү, тилдик варианттардын шайкештиги, жыйынтыктардын ишенимдүүлүгү да текшерилет.

Мындай иш атайын тестологиялык жана психометрикалык адистерди талап кылат. Суроолор апробациядан өтүп, статистикалык жактан талданууга тийиш.

Демек, башка мамлекеттик же мамлекеттик эмес мекеме ЖРТга окшош тест түзө алабы деген суроого жооп — ооба. Ал эми расмий ЖРТны толук масштабда өткөрүүгө даярбы деген суроого жооп берүү үчүн өзүнчө кесиптик аудит керек.

Ошондуктан «ЦООМОдон башка эч ким өткөрө албайт» деген бүтүм да, «мамлекет кааласа эртең эле өткөрүп кетет» деген ишеним да азырынча эртелик кылат.

Бир миллиондон ашык катышуучу: чейрек кылым эмнени көрсөттү?

ЖРТнын башкы максаты жогорку окуу жайларда окууга жөндөмдүү абитуриенттерди аныктоо жана кабыл алууда бирдиктүү баалоо механизмин колдонуу болгон.

ЖРТ КИМДИН КОЛУНДА?ЦООМОнун 2025-жылдагы расмий отчётуна караганда, 2002–2025-жылдары ЖРТга жалпысынан 1 миллион 32 миң 639 адам катышкан. Ушул мезгилде анын жыйынтыгы менен 115 миң 449 абитуриент жогорку окуу жайлардын мамлекеттик гранттык орундарына кабыл алынган.

2024-жылы ЖРТга 51 миң 946, 2025-жылы 57 миң 458 адам катышкан. 2025-жылы тест тапшыргандардын орточо упайы 127,2 болуп, эң жогорку көрсөткүч 242 упайга жеткен.

2025-жылы ЖРТнын жыйынтыгы менен 7 миң 103 адам мамлекеттик грантка өткөн. Алардын орточо упайы 149,8 болгон.

ЖРТ КИМДИН КОЛУНДА?2026-жылдын 29–30-октябрында ЦООМОнун отчётуна таянып жарыяланган маалыматтарда катышуучулардын саны 69 миң 468, орточо упай 127,9, эң жогорку жыйынтык 239 упай болгону көрсөтүлдү. Ошол эле маалыматтарда гранттык орундарга 7 миң 416 абитуриент кабыл алынганы айтылат.

Мунун мааниси кандай?

Бир жылдан кийинки орточо упай бир аз жогорулаганы менен, окуучулардын билими жакшырды деп дароо айтууга болбойт. Жыл сайын катышуучулардын курамы, тесттик тапшырмалар жана башка шарттар өзгөрүшү мүмкүн.

Бирок бир жагдай ачык: ЖРТнын масштабы өсүп жатат. Демек, анын жыйынтыктарынын ишенимдүүлүгүнө, уюштурулушуна жана коомдук көзөмөлүнө болгон талап да күчөшү керек.

Аймактардын мүмкүнчүлүгү бирдейби?

ЖРТнын эң чоң баалуулуктарынын бири — өлкөнүн ар кайсы жеринде жашаган бүтүрүүчүлөргө жогорку билим алуу үчүн бирдиктүү сынак механизмин сунуштаганы.

Бирок бирдей тест тапшыруу бирдей шартта даярдануу дегенди билдирбейт.

ЦООМОнун 2025-жылдагы отчётунда айыл мектептеринен 24 миң 211, Бишкек мектептеринен 14 миң 503, бийик тоолуу аймактагы мектептерден 6 миң 769, облустук борборлор менен чакан шаарлардын мектептеринен 11 миң 521 катышуучу көрсөтүлгөн. Калган 454 киши башка категорияларга кирген.

Ошол жылы айыл мектептеринин бүтүрүүчүлөрүнөн 3 миң 421 адам грантка кабыл алынган. Бишкек мектептеринен 1 миң 163, бийик тоолуу аймактардан 1 миң 253, облустук борборлор менен чакан шаарлардан 1 миң 235 адам өткөн. Башка категориялардын үлүшүнө 31 грант туура келген.

Бул сандар айыл мектептеринин бүтүрүүчүлөрү мамлекеттик гранттардын эң чоң бөлүгүн алганын көрсөтөт. Бирок гранттардын бөлүштүрүлүшүндө мектептердин категориялары эске алынарын унутпоого тийишпиз.

Ошол эле отчётто Бишкек мектептеринин бүтүрүүчүлөрү негизги тесттен орточо 137,0 упай, айыл мектептеринин бүтүрүүчүлөрү 121,4 упай алганы көрсөтүлгөн. Айырма — 15,6 упай.

Бул жөн гана эки статистикалык көрсөткүч эмес. Анын артында билим берүү шарттары, мугалим менен камсыз болуу, окутуунун тили, кошумча даярдыкка жетүү жана үй-бүлөнүн мүмкүнчүлүгү сыяктуу бир нече фактор болушу мүмкүн.

Алардын ар бири өзүнчө изилдөөнү талап кылат.

ЖРТнын жыйынтыгы мектептердеги билим сапатына байланыштуу олуттуу суроолорду көтөрөт. Бирок тест упайынын айырмасын түздөн-түз мектептердин сапаты менен гана түшүндүрүп салуу туура эмес.

Эң жогорку упай кайсы мектептерде?

ЖРТнын жыйынтыгында дагы бир кызыктуу жагдай бар. 2026-жылы эң жогорку көрсөткүчкө жеткен бүтүрүүчүлөр Бишкектин эмес, аймактардагы мектептердин окуучулары болду.

ЖРТ КИМДИН КОЛУНДА?Агартуу министрлигинин 17-июнда жарыялаган расмий тизмесинде Нарын облусунун Кочкор айылындагы Нинакан Жүндүбаева атындагы мектептин бүтүрүүчүсү Айдай Абылаева менен Баткен облустук мектеп-гимназия-интернатынын бүтүрүүчүсү Сезимай Акматова 239 упайдан топтоп, өлкөдөгү эң жогорку жыйынтыкка жеткени көрсөтүлгөн.

Алардан кийинки 236 упайга Бишкектеги «Брайт» эл аралык мектебинин, «Прайм Спектрум» мектеп-комплексинин, Чүй облусундагы Байтик Канай уулу атындагы мектептин жана Караколдогу Х. Карасаев атындагы Ысык-Көл лицейинин бүтүрүүчүлөрү жетишкен.

235 упай алган окуучулардын арасында Манас шаарындагы Зуура Нурматова атындагы лицей, «Лайт-Академия», Бишкектеги «Маариф» билим берүү комплекси, №61 физика-математикалык мектеп жана Ош шаарындагы «Купуев академиясы» бар.

ЖРТ КИМДИН КОЛУНДА?Упайлар боюнча теңдикти эске алганда, бул топко 11 мектеп кирет. Алардын төртөө мамлекеттик же муниципалдык, алтоо мамлекеттик эмес билим берүү мекемелерине кирет. Х. Карасаев атындагы лицейдин учурдагы менчиктик макамы кошумча тактоону талап кылат.

Географиялык жагынан караганда, 11 мектептин тогузу шаарларда, экөө айыл жеринде жайгашкан. Төртөө Бишкекте, жетөө өлкөнүн башка аймактарында.

Бирок эң кызыгы — сандык катышта эмес. Эң жогорку 239 упайдын бири айылдык мектептен, экинчиси Баткен шаарындагы облустук гимназия-интернаттан чыкты. Ал эми алардын артынан мамлекеттик да, жеке менчик да мектептердин окуучулары келе жатат.

Бул ЖРТда жогорку көрсөткүчкө жетүү борбор калаадагы же акы төлөнүүчү мектепте окугандар менен гана чектелбестигин көрсөтөт.

Ошол эле учурда жеке менчик мектептердин алдыңкы топто болушу да көңүл бурууга арзыйт. Мектептердин окуу шарттары, мугалимдердин даярдыгы, окуучуларды тандоо тартиби жана кошумча тесттик даярдык мүмкүнчүлүгү айырмаланышы мүмкүн.

ЖРТ КИМДИН КОЛУНДА?Бирок бир же эки бүтүрүүчүнүн жогорку упайы бүтүндөй мектептин билим сапатын толук чагылдырбайт. Чыныгы салыштыруу үчүн ар бир мектептен ЖРТга канча бүтүрүүчү катышканын, алардын орточо упайын, 200дөн жогорку упай алган окуучулардын үлүшүн жана акыркы үч-беш жылдагы көрсөткүчтөрүн билүү керек.

Дал ушундай маалыматтар мамлекеттик жана жеке менчик мектептердин ЖРТдагы натыйжалуулугун салыштырууга мүмкүнчүлүк берет.

Андай талдоо азыркы иликтөөнүн дагы бир негизги суроосуна жооп берүүгө жардам берет: ЖРТ окуучунун даярдыгын канчалык калыс баалайт жана алынган натыйжага мектептеги билим берүү шарттары канчалык таасир этет?

Кыргызча жана орусча тест: айырма эмнеде?

2025-жылдын дагы бир көрсөткүчү көңүл бурат.

ЦООМОнун расмий отчёту боюнча негизги тестти кыргыз тилинде 32 миң 317 адам тапшырып, алардын орточо упайы 122,1 болгон. Орус тилиндеги тестке 25 миң 141 адам катышып, орточо 133,8 упай алган.

Айырма — 11,7 упай.

ЖРТ КИМДИН КОЛУНДА?Бул сан тесттин бир тилдеги варианты экинчисинен оор деген бүтүм чыгарууга жетишсиз. Анткени тест тапшырган эки топтун билим алуу чөйрөсү, мектептеринин жайгашкан жери жана социалдык курамы ар башка болушу мүмкүн.

Бирок дал ушул айырма тесттин тилдик варианттарын көз карандысыз баалоо зарылдыгын көрсөтөт. Суроолордун котормосу, алардын бирдей татаалдыгы жана психометрикалык көрсөткүчтөрү кандай текшерилет?

ЖРТнын ишенимдүүлүгү тууралуу сөз болгондо, мындай суроолор жоопсуз калбашы керек.

940 сом: абитуриент эмнеге төлөйт?

ЖРТнын каржылык жагы да парламенттеги талкуунун өзөгүнө айланды.

2026-жылдын 19-февралында жарыяланган маалымат боюнча негизги тесттин жана предметтик тесттердин акысы мурдагыдай 470 сом бойдон калган. Ал эми мамлекеттик тил боюнча тесттин баасы мурдагы 200 сомдон 470 сомго жогорулаган.

Натыйжада негизги тест менен мамлекеттик тил боюнча тестке катышкан абитуриент 940 сом төлөйт. Эгер бир предметтик тест тандаса, төлөм 1 миң 410 сомго, эки предметтик тест тапшырса 1 миң 880 сомго жетет.

Миңдеген адам катышкан системада бул олуттуу каражат.

ЖРТ КИМДИН КОЛУНДА?Ошентсе да бардык катышуучунун санын 940 сомго көбөйтүп, алынган сумманы ЦООМОнун кирешеси катары жарыялоо жаңылыштык болмок. Анткени тест түрлөрү боюнча төлөмдөр, жеңилдиктер, кайра каттоо жана башка шарттар өзүнчө эсептелиши керек.

ЦООМОнун сайтында ЖРТга кеткен чыгымдар тууралуу маалыматтар жарыяланып келет. Борбордун жетекчилиги каражаттар тесттик материалдарды даярдоого, басып чыгарууга, кызматкерлердин эмгек акысына, транспортко жана уюштуруу иштерине жумшаларын билдирген.

Бирок коомдук маанидеги кызмат көрсөтүлүп жаткан соң каржылык ачыктык бир гана жалпы түшүндүрмө менен чектелбеши керек.

Жылдык киреше канча? Бир катышуучуга кеткен чыгым кандай? Тесттик тапшырмаларды иштеп чыгууга канча каражат жумшалат? Аудиттин жыйынтыктары кимге жеткирилет?

Бул суроолорго документтер менен жооп берүү ЦООМОнун өзүнө да пайдалуу болмок.

Анткени ачык-айкындуулук ишенимди күчөтөт.

ЦООМОнун жообу: көз карандысыздык эмне үчүн керек?

Парламенттеги сындан кийин, ЦООМОнун жетекчиси Чынара Батракеева түшүндүрмө берди.

ЖРТ КИМДИН КОЛУНДА?Ал борбордун көз карандысыз түзүлүшүн жогорку окуу жайларга кабыл алууда коррупциялык тобокелдиктерди азайтуу максаты менен байланыштырды.

Батракееванын айтымында, тестирлөөнүн жыйынтыгына таасир этүүгө аракет кылгандар болгон. Мамлекеттик органдар тараптан да кысым көрсөтүлгөнүн билдирди. Анын пикиринде, тестирлөөнү мамлекеттик органга өткөрүп берүү административдик таасир этүү коркунучун күчөтүшү мүмкүн.

Жетекчи ошондой эле борбор иштеп келген мезгилде упайларды мыйзамсыз өзгөртүү боюнча коррупция фактысы катталбаганын айтты.

Бул — ЦООМО жетекчисинин билдирүүсү. Аны көз карандысыз текшерүүнүн корутундусу катары кабыл алуу туура эмес. Бирок мындай дооматты да этибарга албай коюуга болбойт.

Чынында ЖРТнын тарыхындагы негизги идеялардын бири — абитуриентти университетке кабыл алууда адам факторунун таасирин азайтуу.

Ошол эле учурда мамлекеттик эмес уюмдун көз карандысыз болушу анын үстүнөн эч кандай көзөмөл жүргүзүлбөшү керек дегенди билдирбейт.

Тескерисинче, тест кызматы мамлекеттик башкаруудан канчалык көз карандысыз болсо, анын ишинин сапатын текшерүү тартиби ошончолук ачык жана түшүнүктүү болушу зарыл.

ЖРТ мамлекетке өтсө эмне өзгөрөт?

Бул жерде эки гана жол бар.

Биринчиси — азыркы моделди сактап, конкурстук тандоону, финансылык отчеттуулукту жана көз карандысыз аудитти күчөтүү.

Экинчиси — мамлекеттик тест кызматын түзүп, ЖРТны толук мамлекеттик башкарууга өткөрүү.

Үчүнчү вариант — аралаш модель. Анда мамлекет талаптарды, сапатты көзөмөлдөө жана аудит жүргүзүү механизмдерин бекитет. Ал эми тесттик тапшырмаларды даярдоо, апробациялоо, тестирлөөнү уюштуруу сыяктуу кызматтар ачык конкурс аркылуу тандалышы мүмкүн.

Ар бир варианттын чыгымы да, тобокелдиги да бар.

Мамлекеттик кызмат жаңы адистерди, инфраструктураны жана маалыматтык коопсуздук системасын талап кылат. Көз карандысыз уюмга таянган модель болсо бир аткаруучуга узак мөөнөттүү көз карандылыкты жаратышы мүмкүн. Аралаш системада көзөмөл жүргүзгөн тараптын чыныгы көз карандысыздыгын камсыз кылуу маселеси чыгат.

Ошондуктан чечимди бир гана саясий билдирүүгө таянып чыгаруу туура болбойт.

Ага чейин үч нерсе ачык болушу шарт: мамлекет ЖРТны өзү өткөрсө канча каражат кетет, жаңы система мурдагыдан канчалык ишенимдүү болот жана абитуриенттердин укугу кандай корголот?

Эң башкы суроо али жоопсуз

Чейрек кылымдык ЖРТ тарыхы — Кыргызстандагы жогорку билимге кабыл алуунун чоң тажрыйбасы. Бул аралыкта бир миллиондон ашуун адам тест тапшырып, жүз миңден ашык абитуриент мамлекеттик грантка өткөн.

Мындай системаны бир күндө жараксыз деп чыгарууга болбойт. Ошол эле учурда көп жыл иштеп келгендиги үчүн гана аны сындан жана текшерүүдөн тышкары калтырууга да негиз жок.

Парламентте көтөрүлгөн маселе коомго бир чындыкты эске салды: ЖРТнын жыйынтыгы мамлекеттик мааниге ээ болгону менен, аны өткөргөн борбор мамлекеттик орган эмес. Мындай механизм мыйзамдык жана конкурстук тартип менен иштеп келет.

Эми талаш мамлекет өзү өткөрүшү керекпи же көз карандысыз уюмбу деген тандоонун айланасында гана калбашы зарыл.

Тесттин сапаты ким тарабынан текшерилет? Каталар үчүн ким жооп берет? Конкурска башка уюмдардын катышуусуна реалдуу мүмкүнчүлүк барбы? Төлөнгөн каражаттын жумшалышы коомчулукка канчалык ачык?

Бул суроолорго так жооп берилмейинче, ЖРТ тууралуу талкуу бүтпөйт.

Анткени абитуриент үчүн тестти өткөргөн мекеменин аталышынан да маанилүү нерсе бар. Ал — өз билими менен алган упайынын туура эсептелгенине, ошол жыйынтык эч кимдин каалоосу менен өзгөртүлбөй турганына болгон ишеним.

ЖРТ кимдин колунда экени маанилүү. Бирок андан да маанилүүсү — ошол колдун ишин ким көзөмөлдөп жатканында.

Нурлан КЫДЫКОВ, “Кут Билим”

Бөлүшүү