ЫСЫК-КӨЛ МАМЛЕКЕТТИК УНИВЕРСИТЕТИНЕ 80 ЖЫЛ

13-июнда Касым Тыныстанов атындагы Ысык-Көл мамлекеттик университетинин түзүлгөнүнө  80 жыл болду. Кереметтүү Ысык-Көлдүн борбору Каракол шаарында жайгашкан К.Тыныстанов атындагы Ысык-Көл мамлекеттик университети ири окуу жайларынын бири катары 1940-жылы 13-июнда Кыргыз ССРинин Эл Комиссарлар Советинин токтому менен эки жылдык Мугалимдер институту болуп ачылган.

Институттун биринчи директору А.Шеньдрих, директордун орун басары болуп белгилүү тилчи З.Бектенов эмгектенген. Улуу Ата мекендик согуштун башталышына байланыштуу 1941-жылы Фрунзедеги педагогикалык институт Пржевальск шаарына көчүрүлүп, бул жердеги мугалимдер институту менен кошулган. Бул учурда ирилештирилген окуу жайды Кыргызстандын эң алгачкы химик окумуштуусу С. Арбаев жетектей баштаган. 1944-жылы Пржевальск мугалимдер институту кайра калыбына келтирилип, ага ушул эле шаарда туулуп-өсүп, Улуу Ата мекендик согушта Белорусияны коргоодо эрдик көрсөтүп, кыргызстандыктардын ичинен биринчи болуп 1941-жылы 10-июлда Советтер Союзунун Баатыры деген ардактуу наамга татыктуу болгон Г.Дмитровдун ысымы ыйгарылган. СССР Министрлер Советинин 1953-жылдын 22-апрелиндеги чечими менен мугалимдер институтунун базасында Пржевальск мамлекеттик педагогикалык институту уюштурулган.

Жаңы ачылган педагогикалык институттун ректорлугуна С.Юсупов дайындалган. Жаңы статуска ээ болгон окуу жай Кыргызстандын, өзгөчө Ысык-Көл жана Нарын аймактары үчүн педагог-адистерди даярдоо ишин жылдан жылга жаңы баскычка көтөрүп, республиканын эң алдыңкы жогорку окуу жайларынын бири катары эсептелип, абройлуу институтка айланган. Кыргызстандын эгемендүүлүккө жетиши менен 1992-жылы 18-декабрда окуу жай университетке айланып, ага кыргыздын чыгаан уулу, таланттуу окумуштуу-тилчиси, туңгуч профессор  Касым Тыныстановдун ысымы ыйгарылган. Ошентип, окуу жайдын профессордук-окутуучулар эмгек жамааты республиканын эл чарбасынын бардык тармактары үчүн керектүү, заманбап адистерди даярдоого белсенип киришкен.