ОШТОГУ МЕКТЕП ЖАНА БАЛА БАКЧАЛАРДА «МАНАС ЖУМАЛЫГЫ» БАШТАЛДЫ

Ош шаарындагы билим берүү мекемелеринде 3-7-декабрь күндөрү «Манас жумалыгы» өтүүдө. Ош шаардык билим берүү башкармалыгынын башчысы А. Асанов билдиргендей, бул жумалык «4-декабрь — Манас күнүнө» байланыштуу уюштурулуп жатат.

Аталган жумалыктын алкагында бала бакчаларда тарбияланып жаткан балдар арасында «Манасым — менин мурасым» аттуу ураанда манас айтуу, «Манас — балдардын көзү менен» аттуу сүрөт тартуу жарышы болуп жатат жана анын галереясы түзүлөт .

Ал эми мектептерде «Манас жумалыгынын» алкагында алп манасчы Жусуп Мамайдын 100 жылдыгы жыйынтыкталып, буга байланыштуу ачык сабактар, класстык сааттар көргөзмөлөр, сахналык программалар жана талкуулар уюштурулат. Андан сырткары 8-10-класстын окуучуларынын арасында «Манас таануу» интеллектуалдык таймашы өтмөкчү.

Маалыматка ылайык, билим берүү мекемелеринде өтүп жаткан бул жумалык Ош шаарында экинчи жылы уюштурулуп жатат.

Эске сала кетсек, 2015-жылдын 27-апрелинде Кыргыз Республикасынын Өкмөтүнүн «Манас» эпосунун күнүн 4-декабрда белгилөө жөнүндөгү атайын токтому чыккан.