Мектеп директору Элдик курултайга экинчи жолу делегат болуп шайланды

Сокулук районунун Күнтуу айыл аймагында V Элдик Курултайга делегаттарды шайлоо жыйыны өтүп, добуш берүүнүн жыйынтыгында Чыныбаев Руслан жана Джолчубекова Айдай V Элдик Курултайга Күнтуу айыл аймагынын атынан делегат болуп шайланды.

Джолчубекова Айдай Күнтуу айыл аймагынын Новое айылындагы Гульсина Капарова атындагы жалпы билим берүү мектебинин директору. Ал буга чейин IV Элдик Курултайга да делегат катары катышкан.

Айдай билим берүү тармагындагы жетекчилик ишмердиги менен катар коомдук иштерге активдүү катышып, райондогу, айыл аймактагы, коомдук турмуштагы жана мектептердеги маанилүү окуяларды, жаңылыктарды кеңири чагылдырып келет. Маалыматтарды креативдүү, заманбап форматта жеткирүүгө, коомчулукка пайдалуу иштерди таанытууга жана жергиликтүү тургундардын үнүн угузууга өзгөчө көңүл бурат.

Анын материалдарында негизги темалар — билим берүү тармагындагы жетишкендиктер, мугалимдердин эмгеги, мектеп турмушундагы жаңылыктар, айыл аймактагы демилгелер жана коомдук мааниге ээ окуялар. Мындай ишмердиктин жергиликтүү коомчулук менен тыгыз байланыш түзүүдө мааниси чоң.

Айдай Джолчубекованын эл тарабынан бир добуштан колдоого алынып, Элдик курултайга делегат болуп кайра шайланышы — ага көрсөтүлгөн бийик ишенимдин жана коомдук колдоонун белгиси.

Элдик Курултай — жер-жерлердеги көйгөйлөрдү, жарандардын сунуштарын жана коомдук мааниге ээ маселелерди талкуулоочу маанилүү аянтчалардын бири. Делегаттардын милдети — өз аймагындагы тургундардын муктаждыктарын жана сунуштарын жеткирүү, коомдук пикирди эске алуу жана көтөрүлгөн маселелердин чечилишине салым кошуу.

Күнтуу айыл аймагынан шайланган делегаттарга жергиликтүү тургундар өздөрүнүн көйгөйлөрүн жана сунуштарын жеткирүүдө чоң жоопкерчилик жүктөшүүдө. Айрыкча айылдардын инфраструктурасын жакшыртуу, билим берүү мекемелеринин шарттарын өнүктүрүү жана калктын жашоо сапатын көтөрүү сыяктуу маселелердин тиешелүү деңгээлде көтөрүлүшү маанилүү.

Элдин ишенимине ээ болуу — сыймык гана эмес, чоң жоопкерчилик. Ал эми ошол ишенимди актоо үчүн эл менен тыгыз байланышта болуп, алардын үнүн тиешелүү деңгээлде жеткирүү зарыл.

Раяна Бейшенбекова, Айсулуу Шаршеналы кызы