Кош дипломдуу билим берүү программасынын алгачкы бүтүрүүчүлөрү

Ош мамлекеттик университети менен Л. Н. Гумилев атындагы Евразия улуттук университети ишке ашырып жаткан кош дипломдуу билим берүү программасын ийгиликтүү аяктап, квалификациялык иштерин коргогон бүтүрүүчүлөр  эл аралык билим берүү стандарттарына жооп берген эки университеттин дипломдоруна ээ болушту.

Программанын талабына ылайык студенттер 1-2-курста Ош мамлекеттик университетинде, 3-4-курста Евразия улуттук университетинде билим алышты. Окууну жалпысынан 15 студент ийгиликтүү аяктаса,  алардын ичинен алты бүтүрүүчү котормо иши адистиги боюнча артыкчылык дипломун алышты.

Кош дипломдуу программанын бүтүрүүчүлөрү келечекте эл аралык уюмдарда, билим берүү мекемелеринде жана өз кесиптик багыттары боюнча эмгектенип, өлкөнүн өнүгүшүнө салым кошушат.

Белгилей кетсек, 2022-жылдын 7-сентябрында Евразия улуттук университети менен Ош мамлекеттик университетинин ортосунда эл аралык кызматташтыктын алкагында адистерди биргелешип даярдоо боюнча келишимге кол коюлган. Аталган келишимдин негизинде 2022-жылдын 6-декабрында ОшМУда Евразия улуттук университетинин «Казак тили жана маданияты борбору» расмий ачылган. Ошол эле окуу жылында орус тили жана адабияты жана котормо иши адистиктери боюнча кош дипломдуу билим берүү программасына алгачкы студенттер кабыл алынган.

Учурда эки жогорку окуу жайдын кызматташтыгынын алкагында бакалавриат жана магистратура деңгээлинде орус тили жана адабияты, котормо, чет тили: эки чет тили, физика жана математика багыттары боюнча билим берүү программалары ийгиликтүү ишке ашырылып, студенттер окууларын улантууда.