Эл аралык университет: 1200 студент мекенине кайтты

Кыргызстан эл аралык университетинде окуп жаткан 1200 студент мекенине кайтты. Бул тууралуу аталган окуу жайдын ректору Асылбек Айдаралиев «Кабар» агенттигинде өткөн маалымат жыйында билдирди.

Ректордун айтымында, мекенине кайткандардын көбү 1-2-курстун студенттери. Жогорку курста окуган студенттер азырынча бул жакта, алар менен сүйлөшүүлөр жүрүп жатат.

“Биздин университетте жалпы 3 миң чет элдик студент билим алат. 18-майга караган түнү болгон окуядан кийин университетте окуп жаткан 1200 студент өз өлкөсүнө кетти, алардын 90 пайызы пакистандыктар. Учурда 3 студентибиз университеттин ооруканасында дарыланууда. Мындай жагдай кайра кайталанбашы үчүн түшүндүрүү иштерин жүргүзүп жатабыз”, — деди Асылбек Айдаралиев.

Билим берүү жана илим министрлигинин маалыматы боюнча, Кыргызстанда 28 миң 800 чет элдик студент билим алууда. Анын басымдуу бөлүгүн Индия жана Пакистандан келген студенттер түзөт.

2022-жылы медициналык билим берген окуу жайларда чет элдик студенттер 3 миң доллардан, ал эми жергиликтүү студенттер 60 миңден кем эмес каражат төлөйт.

Эльвира Какиева