БЕЛОРУССИЯДА АКЫСЫЗ БИЛИМ АЛУУ ҮЧҮН АРЫЗДАРДЫ КАБЫЛ АЛУУ 6-МАРТКА ЧЕЙИН УЗАРТЫЛДЫ

Белоруссиянын Кыргызстандагы элчилиги 2020-2021-окуу жылы карата магистратура программасы боюнча акысыз билим алуучулар үчүн документтерди кабыл алууну 6-мартка чейин узартты.

Грант окууга кеткен чыгашаны камтыйт, стипендия берет.

Кыргызстандыктар магистратура программасы боюнча төмөнкү багыттарга документ тапшырса болот:

• Лингвистика (тилди көрсөтүү керек) – 1 орун;
• Маалыматты даярдоо, башкаруу жана системалык анализдөө (тармактар боюнча) – 1 орун.

Талапкерлерди тандоо эки этапта жүрөт:

 Биринчисинде катышуучулар Белоруссия элчилигине төмөндөгү документтерди тапшыруусу зарыл:

• элчиликтин атына кайсы адистикти жана эмне үчүн тандаганы тууралуу эркин формадагы арыз;
• чет өлкөгө чыгуу документтеринин же жалпы жарандык паспортунун көчүрмөсү;
• билим алгандыгы тууралуу документтин көчүрмөсү же билим берүү уюмунун жетекчиси күбөлөндүрүп, бардык предметтер боюнча алган баалары көрсөтүлүп, окуп жатканын далилдеген маалымат кат;
• орус тилин билүүсүн тастыктаган документтин көчүрмөсү;
• тандаган адистиги боюнча билим алууга жөндөмдүүлүгү көрсөтүлгөн медициналык аныктама жана ВИЧ жоктугу боюнча сертификат;
• окуу жайдан мүнөздөмө (окуп жаткандар үчүн);
• белоруссиялык тегин аныктоочу документ (эгер болсо).

Документтер орус же белорус тилинде даярдалышы керек. Сынакка катышуучунун акыркы окуу жылындагы орто упайы 4,3 баллдан кем эмес болушу зарыл.

Экинчи этап 15-июлга чейин аралыкта аңгемелешүү түрүндө өтөт. Экинчи тур тууралуу Белоруссия элчилиги талапкерге 20-майга чейин маалымат берет.

Грант катышуучунун жол акысына, жатаканага, тамак-ашка, медициналык камсыздандырууга жана визага кеткен чыгымдарды камтыбайт.

Белгилей кетсек, Белоруссия өкмөтү 2020-2021-окуу жылы үчүн Кыргызстанга жалпы сегиз гранттык орун бөлгөн.

Билим берүү жана илим министрлигинин басма сөз кызматы