«АРУУ КЫЗ – ҮЙДҮН КУТУ, БИЛИМДҮҮ КЫЗ – ЭЛДИН ҮМҮТҮ»

Улуттук баалуулуктарды сактоо, улуттук нарк-насилди жайылтуу жана кыздардын коомдогу ордун жогорулатуу максатында Ат-Башы айыл аймагынын мектептеринин 9-10-11-класстарынын кыздары үчүн масштабдуу тарбиялык иш-чара өттү.

Бул демилге Кыргыз Республикасынын Президентинин «Улуттук дем – дүйнөлүк бийиктик» Уңгужолу Жарлыгынын алкагында өткөрүлгөн «Ат-Башынын кыздары — бийиктик, биримдик, өнүгүү» форумунда кабыл алынган  «Айымдардын улуттук нарк-насилин сактоо» резолюциясынын милдеттерин ишке ашыруу алкагында уюштурулду. Аталган иш-чараны Нарын облустук аялдар кеңеши жана Ат-Башы айыл өкмөтү уюштурду.

Иш-чаранын негизги максаты — кыздарды адептүүлүккө, ыймандуулукка жана улуттук каада-салттарды урматтоого тарбиялоо; өзүн-өзү өнүктүрүүгө, билимге умтулууга жана келечекке жоопкерчилик менен кароого багыт берүү; зордук-зомбулуктун, укук бузуулардын жана терс көрүнүштөрдүн алдын алуу.

Катышуучуларга таасирдүү баяндамалар окулуп жана презентациялар көрсөтүлдү. Алсак,

Гүлжамал Кулумбаева (КРнын маданиятына эмгек сиңирген ишмер, тележурналист) — «Кызга кырк үйдөн тыюу» — кыргыз элинин кыз тарбиялоодогу улуттук салт-санаасы, адеп-ахлак эрежелери;

Жамиля Сабитакунова (тектаанучу-психолог) — «Туура тандоо — жаркын келечектин кепилдиги: ар-намысты сактоо жана өзүн сыйлоо маданияты» боюнча кызыктуу презентациясын тартууласа, “Чет өлкөдө билим алуу — дүйнөгө ачылган эшик” (Кембридж университетинин бүтүрүүчүсү Н. Ногойбаевдин кеп-кеңештери) баяндамасы ар бир окуучунун бүйүрүн кызытты.

Иш-чарада төмөнкү маанилүү багыттар кеңири талкууланды:

Чыныгы достук жана чөйрө тандоо — достуктун мааниси жана жоопкерчилик.

Зомбулуксуз жашоо – коопсуз келечек — коргонуу жолдору жана алдын алуу чаралары.

Социалдык тармактагы маданият — интернетти туура пайдалануу жана санариптик коопсуздук.

Билим жана кесип тандоо — келечекке максат коюу.

Иш-чаранын соңунда кыздарга коноктор насааттарын айтып, катышуучулар «Менин максатым, менин убадам, келечегим» аттуу рубриканын алкагында өз максаттарын кагазга жазышты.

Жыйынтыгында Ырыс Мөндүрбаева иш-чараны «Кыздын көркү – адепте, келечектин көркү – билимде» деген ураан менен жыйынтыктады.

Гүлнара АЛЫБАЕВА, “Кут Билим”