СЕГИЗ ГРАНТТЫК ОРУН. БЕЛОРУССИЯДА АКЫСЫЗ БИЛИМ АЛУУНУН ШАРТТАРЫ

Билим берүү жана илим министрлиги Белоруссия университеттеринде акысыз билим алуу программасына катышуучулар үчүн сынак шарттарын маалымдайт.

Белгилей кетсек, Белоруссия өкмөтү 2020-2021-окуу жылы үчүн Кыргызстанга сегиз гранттык орун бөлгөн.

Бакалавриат программасы боюнча бөлүнгөн гранттык орундар:

• Финансы жана кредит – 1 орун;
• Биотехнология – 1 орун;
• Маалымат технологиялары – 3 орун.

Магистратура программасы боюнча бөлүнгөн гранттык орундар:

• Лингвистика (тилди көрсөтүү керек) – 1 орун;
• Эл аралык укук – 1 орун;
• Маалыматты даярдоо, башкаруу жана системалык анализдөө (тармактар боюнча) – 1 орун.

Талапкерлерди тандоо эки этапта жүрөт:

Биринчисинде катышуучулар Белоруссия элчилигине төмөндөгү документтерди тапшыруусу зарыл:

• элчиликтин атына кайсы адистикти жана эмне үчүн тандаганы тууралуу эркин формадагы арыз.;
• чет өлкөгө чыгуу документтеринин же жалпы жарандык паспортунун көчүрмөсү;
• билим алгандыгы тууралуу документтин көчүрмөсү же билим берүү уюмунун жетекчиси күбөлөндүрүп, бардык предметтер боюнча алган баалары көрсөтүлүп, окуп жатканын далилдеген маалымат кат;
• орус тилин билүүсүн тастыктаган документтин көчүрмөсү;
• тандаган адистиги боюнча билим алууга жөндөмдүүлүгү көрсөтүлгөн медициналык аныктама жана ВИЧ жоктугу боюнча сертификат;
• окуу жайдан мүнөздөмө (окуп жаткандар үчүн);
• белоруссиялык тегин аныктоочу документ (эгер болсо).

Документтер орус же белорус тилинде даярдалышы керек. Сынакка катышуучунун акыркы окуу жылындагы орто упайы 4,3 баллдан кем эмес болушу зарыл.

Экинчи этап 15-июлга чейин аралыкта аңгемелешүү түрүндө өтөт. Экинчи тур тууралуу Белоруссия элчилиги талапкерге 20-майга чейин маалымат берет.

Грант окууга кеткен чыгымдарды камтыйт, стипендия берет.

Грант катышуучунун жол акысына, жатаканага, тамак-ашка, медициналык камсыздандырууга жана визага кеткен чыгымдарды камтыбайт.

Документтер 2020-жылдын 25-февралына чейин тапшырылышы керек.

 Билим берүү жана илим министрлигинин басма сөз кызматы