МИНИСТР ТЕХНИКАЛЫК УНИВЕРСИТЕТТЕРДИН ОРУС-КЫРГЫЗ КОНСОРЦИУМУНУН ДЕЛЕГАЦИЯСЫ МЕНЕН ЖОЛУГУШТУ

19-сентябрда билим берүү жана илим министри Догдуркүл Кендирбаева техникалык университеттердин орус-кыргыз консорциумунун өкүлдөрү менен илимий жана билим берүү тармагындагы интеграциялык иштерди, экономика үчүн техникалык адистерди даярдоо жана биргелешкен долбоорлорду ишке ашыруу маселелерин талкуулады.

Догдуркүл Кендирбаева эмгек рыногунда инженерлерге болгон суроо-талапты жана техникалык адистиктер боюнча бюджеттик негизде окутууга квота көбөйгөнүн белгилеп, эки өлкөнүн эмгек рыногу үчүн атаандаштыкка жөндөмдүү адистерди даярдоо боюнча кызматташууга кызыкдар экенин билдирди.

Техникалык университеттердин орус-кыргыз консорциуму 2013-жылы түзүлгөн. Консорциум Россия Федерациясынын 41 университетин жана Кыргыз Республикасынын 15 университетин бириктирет. Биргелешкен билим берүү программаларынын алкагында 2023-2024-окуу жылында 150дөн ашык россиялык студент Кыргызстандын ЖОЖдорунда, 30дан ашык кыргызстандык Россиядагы өнөктөш ЖОЖдордо билим алган.

Белгилей кетсек, 19-21-сентябрда Ысык-Көл облусунда Техникалык университеттердин орус-кыргыз консорциумунун XII жалпы жыйыны өтүп жатат.