КЕЛЕЧЕККЕ КАДАМ: KIT FORUM 2025 ТААСИРЛЕР

29–30-май күндөрү Бишкек шаарында KIT Forum 2025 форуму болду. Бул иш-чарага катышуу мен үчүн кесиптик эң маанилүү окуялардын бири болду. Жалпы Кыргызстандык санарип мугалимдерге жана жаштарга жасалма интеллект (ЖИ) жаатындагы дүйнөлүк жаңылыктарды өз көзүбүз менен көрүп, угуунун мүмкүнчүлүгүн тартуулады.

Илим менен тажрыйбанын кошулмасы

Форумдун ачылышында Кыргызстандын министрлери, Түрк мамлекеттер уюмунун өкүлдөрү жана АКШ менен Улуу Британиянын элчилери сөз сүйлөштү. Алар ЖИ дүйнөнүн бардык тармактарын өзгөртүп жатканын белгилеп, Кыргызстан үчүн бул технологияны мындан ары да өнүктүрүү убактысы келгенин айтышты.

Өзгөчө таасир калтырган баяндамалардын бири — Google DeepMind компаниясынын өкүлү, программалык камсыздоо боюнча инженер-изилдөөчү Алия Рысбек кызынын «ЖИ кайда алып барат?» деген негизги баяндамасы болду. Ал ЖИнин адамзат келечегине тийгизе турган таасири тууралуу ойлондуруучу фактылар менен бөлүштү.

ЖИ билим берүүдө — мүмкүнчүлүктөр дүйнөсү

Информатика мугалими катары маанилүү болгон сессия — бул «AI in Education» болду. Бул сессияда билим берүү министрлигинин өкүлдөрү, университет окутуучулары жана ЖИ тармагындагы адистер билим берүүдө жаңы көндүмдөрдү калыптандыруу тууралуу сүйлөштү. ЖИ — мугалимге атаандаш эмес, тескерисинче, жардамчы болору дагы бир жолу ырасталды.

Жеке тажрыйба менен бөлүшүү

Мен үчүн өзгөчө сыймыктуу учур — бул форумда өзүмдүн баяндамам менен чыгышым болду. Темам:
«Информатика мугалими үчүн ЖИ: кандайча жардам берет?»

Бул баяндамада ChatGPT сыяктуу ЖИ куралдары сабак даярдоодо, окуучулардын иштерин текшерүүдө жана интерактивдүү окутууда кандайча жардам бере ала турганын конкреттүү мисалдар менен көрсөттүм. Кесиптеш мугалимдердин кызыгуусу жана суроолору ЖИге болгон кызыгуунун артып жатканын айгинеледи.

ЖИ бардык тармактарда

Форумдун башка сессияларында ЖИнин бизнес, финансылык технологиялар, киберкоопсуздук жана чыгармачыл индустриялардагы орду тууралуу сөз болду. Айрыкча «AI in Business» жана «Smart Cities» сессиялары ЖИнин өлкөнүн экономикалык жана шаардык өнүгүүсүнө кандайча түрткү боло ала турганын көрсөттү.

Жыйынтык

KIT Forum 2025 — бул жөн гана иш-чара эмес, бул келечекти калыптандыруу үчүн чогултулган күч. ЖИ — мугалимге, ишкерге, студентке, мамлекеттик кызматкерге, илимпоз-окумуштууларга — ар бир адамга тиешелүү тема экенин дагы бир жолу түшүндүм.

Кыргызстан санариптик жаңылануунун босогосунда турат. Бул форум мага жана мен сыяктуу миңдеген адистерге жаңы дем берди. Эң маанилүүсү — алган билимди тек гана эскерүү эмес, аны колдонуп, өзгөрүү жолунда конкреттүү кадамдарга өтүү.

KIT Forum 2025тин максаты — жасалма интеллект тармагындагы соңку жетишкендиктерди тааныштырып, Кыргызстандын адистерин глобалдык инновациялык процесстерге тартуу болду. Форум билим берүү, бизнес жана технология тармагындагы кызматташтыктарды бекемдөөгө чоң өбөлгө түздү. Бул иш-чара ар бир катышуучуга практикалык тажрыйба топтоп, жаңы байланыштарды түзүп, келечекке багытталган кызматташтыктын эшигин ачты.

Ноокат районундагы М.Гапаров атындагы окуу-тарбия комплексинин информатик мугалими: ИСМАИЛ КОШМУРЗАЕВ