ЖАҢЫ УСУЛДАРДЫ ПАЙДАЛАНУУ – УЧУР ТАЛАБЫ

Ысык-Көл облустук билим берүү институтунун мектеп менеджменти жана педагогика лабораториясы 2025-жылдын 27-январынан 2-февралына чейин мектеп директорлорунун окуу-тарбия иштери боюнча орун басарларынын билимин жогорулатуу 72 сааттык курсту ийгиликтүү аяктады.

Ысык-Көл облустук билим берүү институтунун мектеп менеджменти жана педагогика лабораториясынын башчысы Тамара Мамырованын маалыматына таянсак, курска бардык облустун рай/шаардык мектептеринен угуучулар келишти.

— Курстун окуу программасы заманбап, окуу бөлүмүнүн башчыларынын муктаждыгына жараша түзүлгөн. Темалар: «Балдардын келечеги — STEM программасын окутуп өздөштүргөн мугалимдерге көз каранды», “Кыргызстандын PISA-2025 изилдөөсүнө катышуусу — жаңы бийиктиктер жана жаңы горизонттор», «Алтын казык» программасы 12 жылдык мектеп: Эмне үчүн 6 жаштан?»,  “Сингапурдун 5 Е окутуу модели деген эмне?»  ж.б. Бул лекцияларды, семинар-тренингдерди компетенттүү адистер Т.Мамырова, Ж.Урумов, М.Курманалиев, Б.Арыкбаева кызыктуу, интерактивдүү усулдар, ыкмалар менен натыйжалуу өтүп беришти. Чеберчиликти жогорулатууда практикалык көндүмдөр чоң мааниге ээ эмеспи, бул жагынан Ак-Суу районундагы Ж.Алышпаев а.ж.о. мектептин директору Акунова Г.С. жана педжамааты «Санариптик билим берүү —  билим берүүнүн сапаттын кепилдиги» деген темада даярдаган сабактар жогорку деңгээлде өттү, — дейт лаборатория башчысы.

Мындан сырткары Балыкчы шаарынын №5 Ч.Айтматов а.ж.о. мектепте Кыргыз Республикасынын билим берүүсүнө эмгек сиңирген орус тили жана адабияты мугалими Дөөткулова Ч.Т. педагогикалык алдыңкы иш тажрыйбасын жайылтуу иш-чарасы  натыйжалуу болду. Бул иш-чараны даярдаган жана өткөргөн Балыкчы шаарынын билим берүү бөлүмү башчысы Эсенаманова Ж.С. жана окуу-усулдук кабинеттин башчысы Каденова П.Ш. Ак-Суу районундагы У.Калиев а.ж.о. мектептин педжамааты «Балага тамчыдай билим берүү үчүн мугалим көлдөй билимге ээ болуусу зарыл»  деген темада абдан актуалдуу, кызыктуу сабактарды тартуулай алышты. Мектептин окуу-тарбия иштерин, санпиндин эрежесин сактоодо, чарба иштеринин иреттүүлүгүн натыйжалуу, сапаттуу алып барышкан мектеп директору М.А.Термечиков, окуу бөлүмүнүн башчысы Г.У. Өмүрчиева.

Гүлнара АЛЫБАЕВА, “Кут Билим”