ПРОФЕССОР АДИЛЖАН МАРУФИЙ ДҮЙНӨДӨН КАЙТТЫ

Кыргызстандын билим берүү тармагы орду толгус жоготууга учурады. 2025-жылдын 28-мартында көп жылдар бою өмүрүн жаш муундарды тарбиялоого жумшаган кадырлуу педагог-окумуштуу, техника илимдеринин доктору, М.Адышев атындагы Ош технологиялык университетинин профессору, Кыргыз Республикасынын билим берүүсүнүн отличниги Маруфий Адилжан Таджимухамедович 78 жаш курагында каза болду.

Билим берүү жана илим чөйрөсүндөгү белгилүү ишмер, өз ишинин чыныгы устаты, илимий-билим чөйрөсүндө кадыр-баркка ээ Адилжан Таджимухамедович 1947-жылы 1-январда Ош шаарында туулган.

Адилжан Таджимухамедович В.В.Куйбышев атындагы Москва инженердик-курулуш институтун 1969-жылы аяктап,  «Өнөр жай жана жарандык курулуш» адистиги боюнча инженер-куруучу квалификациясы ыйгарылган.

А.Т.Маруфий эмгек жолун 1969-1971-ж. СССРнын Тынч океандык чек аралык аймагынан аскер кызматкери;  1971-1972-жылдары Ош үй курулуш комбинатынын бөлүм башчысы; 1972-жылы Фрунзе политехникалык институтунда (ФПИ) окутуучу болуп иштөөдөн баштап,  1980-жылы кандидаттык диссертациясын жактагандан кийин ФПИнин Оштогу кечки факультетинин жалпы техникалык дисциплина секторунун башчысы, 1984-1991- жылдары «Колдонмо механика» кафедрасынын башчысы, 1991-2011-жылдары ОшТУнун инженердик-курулуш факультетинин деканы болуп эмгектенип,  инженердик адистерди даярдоо системасындагы 50 жылдык эмгек жолунда жүздөгөн мыкты инженер-куруучуларды  даярдаган.

2004-жылы «Развитие теории расчета плит и полос на упругом основании с учетом неполного контакта с основанием» деген темада докторлук диссертациясын ийгиликтүү коргоп, академик В.И. Травуштун колдоосу менен кыргызстандын түштүгүндө жаңы маалыматтык технологияларды колдонуу менен деформацияланган негизде конструкцияны эсептөө теориясы боюнча кыргыз мектебин ачууга жетишкен.

А.Маруфийдин жетекчилиги алдында үч кандидаттык диссертация жакталып, бир диссертациялык жумуш диссертациялык кеңешке тапшырылган.

А.Маруфий «Деформацияланган негиздеги конструкцияларды эсептөө теориясы» чөйрөсүндөгү ири адис катары таанымал болуп, студенттер, илимпоздор жана кызматкерлер арасында кадыр-баркка  ээ болгон.

А.Маруфий 55 окуу-методикалык колдонмолорду иштеп чыгып, алардын ичинен  үч монография (2003-жыл, Москва шаары, 2006,2014-жылдары Бишкек шаары) жана 12 окуу куралы Кыргыз Республикасынын Билим берүү жана илим министрлигинин грифи менен чыгарылган. Мындан сырткары, анын 198 илимий макалалары жарык көрүп, Кыргызпатент багытында 16 автордук укукка ээ болгон.

А. Маруфий билим берүү тармагындагы көп жылдык жигерлүү эмгеги үчүн «Эл агартуунун отличниги» төш белгисинин (1994-жыл), «Кыргыз Республикасынын билим берүүсүнө эмгек сиңирген кызматкери» ардак наамынын (2008-жыл) ээси болуу менен ага «Кыргыз туусу» гезити жарыяланган сынакта «2013-жылдын эң мыкты окумуштуусу» номинациясы ыйгарылган. Андан тышкары, Ош шаарынын мэриясынын, Ош облустук мамлекеттик администрациясынын, Фрунзе политехникалык институтунун (КМТУ), Ош технологиялык университетинин бир нече жолку жылдын мыкты лектору, окутуучу-методист, окумуштуу изилдөөчү, профессору номинацияларынын жеңүүчүсү, ОшТУнун жана коомдук уюмдардын Ардак грамоталарына татыктуу болгон.

Адилжан Таджимухамедович туугандарынын, жакындарынын жана элибиздин эсинде дасыккан илимпоз, үлгүлүү инсан катары түбөлүккө калат.

Ош технологиялык университетинин жамааты үй-бүлөсүнө, балдарына, неберелерине жана туугандарына терең кайгыруу менен көңүл айтат жана кайгысын тең бөлүшөт.