КЫРГЫЗСТАН ЖАНА КАЗАКСТАНДЫН ПРЕЗИДЕНТТЕРИ БИШКЕКТЕГИ КЕМЕЛ ТОКАЕВ АТЫНДАГЫ МЕКТЕП-ГИМНАЗИЯГА БАРЫШТЫ

Кыргыз Республикасынын Президенти Садыр Жапаров жана Казакстан Республикасынын Президенти Касым-Жомарт Токаев өткөн аптада  Бишкектеги Кемел Токаев атындагы № 33 орто мектеп-гимназиясына барышты.

Маалыматка таянсак, билим берүү мекемеси 1940-жылы негизделген. Улуу Ата Мекендик согуш жылдарында имараты мотоаткычтар окуу жайы жана аскердик госпиталь катары пайдаланылган. Анын бүтүрүүчүлөрүнүн арасында согуштун катышуучулары, анын ичинде Улуу Ата Мекендик согуштун I жана II даражадагы ордендеринин кавалери, жазуучу Кемел Токаев бар.

1947-жылдын 1-сентябрында мектеп өз ишин жандандырган. 2012-жылы ал “мектеп-гимназия” макамын алган.

2025-жылдын май айында Президент Садыр Жапаровдун демилгеси менен мектеп-гимназияга Кемел Токаевдин ысымы ыйгарылган.

Аталган №33 мектеп-гимназиясы Бишкектеги эң мыкты он билим берүү мекемесинин катарына кирет.

Кыдыруу учурунда мамлекет башчылар мектептин имаратын жана Кемел Токаевге арналган маалымат бурчун көрүп чыгышты.

Андан соң лидерлерге буга чейин Казакстандын Президенти белек кылган окуучулар үчүн автобусту көрсөтүштү. Мындан тышкары Президенттер мектеп-гимназиянын жамааты жана окуучулары менен баарлашты.

Соңунда Президент Касым-Жомарт Токаев окуучуларга окуудагы ийгиликтерди каалап, мектеп келечектеги лидерлерди жана татыктуу адистерди тарбиялап чыгарат деген үмүтүн билдирди.

Г.А., “КБ”