«АТАЛАРДЫН ЭРДИКТЕРИН ДАҢКТАЙБЫЗ!»

05.05.2020
0

Кара-Суу районундагы №70 Ибрагим Кулбаев атындагы орто мектебинде Улуу Жеңиштин 75 жылдыгына карата согуш баатырларын эскерүү эстафетасы болуп өттү.

9-май — Жеңиш майрамы. Совет элинин эң ыйык, эң улуу майрамы. Согуш… Кулакка жагымсыз бул сөз канчалаган жоокерлердин жанын алып, көптөгөн адамдарды азапка салып, али күнгө эстен чыкпайт келет.

Анткени бул күнгө жетүү үчүн Совет эли 27 млн. адамынан ажыраган. Бул күн Совет элинин төрт жылга созулган эң оор, эң кайгылуу Улуу Ата Мекендик согуштагы фашисттик Германиянын үстүнөн жеңишке жеткен күн.

Согуштун каары, азап-тозогу канчалык оор, канчалык кайгылуу болбосун, 75 жылдан бери жергебизде белгиленип келе жатат.

— Ар бир жылы кутман ардагерлерди көрүп, согуш апаатын өз ооздорунан угуп, алар менен чогуу Жеңиш күнүн белгилеп жатканыбыз биз үчүн зор сыймык. Анткени алардын саны суюлуп баратат. Биз аларды көрүп турган акыркы муундарбыз, — дейт мектептин кыргыз тили жана адабияты мугалими Раева Гүлжамал.

Тарых барактарына кайрылсак, Улуу Ата Мекендик согушта Кыргызстандан 365 миң жоокер кан майданга аттанган. Алардын 155 миңден ашыгы курман болгон. Беш миңдей жоокер ушу кезге дейре дайынсыз.

— Улуу Ата Мекендик согушка биздин Жаңы-Арык айыл аймагынан көптөгөн аталар катышып келген. Бирок алардын саны жылдан-жылга азайып баратканы өтө өкүнүчтүү, — дейт мектептин башталгыч класстар мугалими Атакулова Замира.

Замира эжейдин 4″а»классынын окуучусу Токтобаева Раяна да бул күнкү эстафетага жандуу катышып, өз салымын кошту.

Согуш баатырларын эскерүү эстафетасында мектеп окуучулары чоң аталарынын сүрөттөрүн кармап турушту.

— Менин чоң-чоң атам Жунусов Арын Улуу Ата Мекендик согуштун ардагери болгон. Мен аны менен дайыма сыймыктанам, — дейт Жунусова Сумая.

— Бул сүрөттөгү жоокер менин чоң-чоң атам Арыков Паша. Ал 1939-жылы Советтик армиянын катарында кызмат өтөгөн. 1943-жылы чоң атам оор жарадар болуп, мекенине кайтып келген, -дейт 6″а»классынын окуучусу Сарыбашева Адинай.