ЖАШ АДИСТЕРДИН ДИАЛОГУ: МЕКТЕП МЕНЕН ҮЙ-БҮЛӨНҮН КЫЗМАТТАШУУСУ ТАЛКУУГА АЛЫНДЫ

Бишкекте жаш адистер үчүн мектеп–үй-бүлө кызматташуусун чыңдоого багытталган семинар болуп өттү.

Бишкек шаарындагы №33 орто мектепте тарбиялык иштер боюнча жаш директордун орун басарлары, социалдык педагогдор жана мектеп психологдору үчүн семинар уюштурулду. Иш-чара санариптик чөйрөнүн өсүп жаткан таасири жана билим берүү системасындагы жаңы чакырыктар шартында мектеп менен үй-бүлө мамилесин күчөтүүгө арналды.

Семинардын жүрүшүндө мектеп администрациясы — тарбиялык иштер боюнча директордун орун басары, социалдык кызматкер жана психолог — окуучулардын коопсуздугун жана гармониялуу өнүгүүсүн камсыз кылуудагы биргелешкен аракеттер боюнча өз тажрыйбалары менен бөлүшүштү. Мугалим, класс жетекчи жана ата-эне ортосундагы тыгыз байланыш — баланын ийгилигинин негизи экендиги белгиленди.

Иш-чаранын алкагында «Инновацияларды, лидерликти жана адам ресурстарын өнүктүрүү фонду» коомдук фонду «ДемиАрт» театры менен бирге форум-театр форматындагы «Өзгөрүүлөр театры — коопсуз мектептерге жол» аттуу социалдык спектаклин тартуулады. Катышуучулар спектаклдин жүрүшүнө активдүү аралашып, көтөрүлгөн көйгөйлөргө өздөрүнүн чечүү жолдорун сунуштап, каармандардын ролунда да ойноого мүмкүнчүлүк алышты.

Семинардын соңунда катышуучулар баланын тарбиясында бардык чоңдордун бирдиктүү аракетинин маанисин баса белгилешти. «Чоңдор бала үчүн бириккен жерде өсүш пайда болот. Мектеп бардык нерсени билгенде эмес, ар ким өз ишин чын дилден аткарганда күчтүү болот», — деген жыйынтык айтылды.

Иш-чара жаш адистер үчүн тажрыйба алмашуу, учурдагы көйгөйлөрдү талкуулоо жана коопсуз, камкор билим берүү чөйрөсүн түзүүнүн заманбап ыкмаларын издеген маанилүү аянтча болду.

(БК)