ЮНЕСКОну Жакынкы Чыгыштагы маданий мурастардын абалы тынчсыздандырат

ЮНЕСКО Жакынкы Чыгыштагы күчөп жаткан зомбулук жана аскердик чыңалуу шартында маданий мурастарды сактоо маселесине тынчсыздануусун билдирди.

Маалыматка ылайык, 2-март дүйшөмбү күнү Голестан сарайы — Тегеран шаарында жайгашкан жана ЮНЕСКОнун Бүткүл дүйнөлүк мурастар тизмесине кирген тарыхый объект — аба соккусунан кийин түшкөн сыныктар менен жарылуунун толкунунан жабыркаган. Аба соккусу объекттин буфердик аймагында жайгашкан Араг аянтына жасалгандыгы кабарланууда.

ЮНЕСКО өлкөдөгү жана жалпы аймактагы маданий мурастарды коргоо боюнча кырдаалды кылдат көзөмөлдөөнү улантып жатканын билдирди. Уюм маданий жана тарыхый объектилерге зыян келтирбөө максатында кызыкдар тараптарга Бүткүл дүйнөлүк мурастар тизмесине кирген объектилердин, ошондой эле улуттук маанидеги эстеликтердин географиялык координаттарын жөнөткөнүн маалымдады.

ЮНЕСКО маданий баалуулуктар эл аралык укук тарабынан корголорун дагы бир жолу эскертти. Алардын катарына 1954-жылдагы Гаага конвенциясы — куралдуу жаңжал маалында маданий баалуулуктарды коргоо тууралуу документ, ошондой эле 1972-жылдагы Бүткүл дүйнөлүк мурастар жөнүндө конвенция кирет.

Бул эл аралык келишимдерге ылайык, маданий мурастар адамзаттын жалпы баалуулугу катары каралып, куралдуу жаңжалдар учурунда да корголууга тийиш.