УЛУУ ЖЕҢИШКЕ АРНАЛГАН ЧЫГАРМАЧЫЛЫК КОНКУРС

Бишкек шаарынын кесиптик лицейлеринин окуучуларынын арасында Улуу Жеңиштин 80 жылдыгына арналып өткөрүлгөн чыгармачылык конкурстун жыйынтыгы боюнча жеңүүчүлөрдү жарыялоо, сыйлоо жана концерттик программа 3-апрелде “Сейтек” балдар борборунда болот.

“Эсимде. Мен сыймыктанам” аттуу чыгармачылык конкурс кесиптик лицейлердин окуучуларынын арасында Билим берүү жана илим министрлигинин алдындагы маданият спорт жана дене-тарбия методикалык борбору тарабынан өткөрүлдү.

2025-жылдын 25-мартынан 27-мартына чейин конкурстун биринчи этабы болду. Биринчи этапка 12 кесиптик лицейи катышты. Конкурсанттар кыргыз жана орус композиторлорунун аскердик-атуулдук ырларын ырдашты жана Ч.Айтматов, С. Жусуев, А.Токомбаев сыяктуу кыргыз адабиятынын классиктеринин чыгармаларынан монологдорду аткарышты. Мындан сырткары, Улуу Ата мекендик согуштун ветерандары жөнүндө дил баян жазуу жана видео ролик тартуу боюнча конкурс өткөрүлдү.

Конкурсанттарды  курамында Баткен окуясынын катышуучусу Омаралиев Таалайбек, Кыргыз мамлекеттик искусство институнун режиссура жана актёрдук чеберчилик кафедрасынын башчысы Урматбеков Чынасыл, кино жана телевидение факультетинин ага окутуучусу Карагулов Нурдин, Борбордук армия үйүнүн артисти Турарбек кызы Бурулча, КР маданиятына эмгек сиңирген ишмер Алышбаева Дамира жана башка кесипкөй адистер болгон калыстар тобу баалашты.