STEAM: «КЫРГЫЗДЫН УЛУТТУК ТАМАК-АШТАРЫ»

Өткөн аптада «Креатив-Таалим» Билим берүү комплексинде STEAM билим берүү багыты боюнча иш-чара болуп өттү.

Ага аталган мектептин 8-класстын окуучулары, мугалимдери жана ата-энелер катышты. Анда окуучулар «Кыргыздын улуттук тамак-аштары» деген теманын алкагында сүт, дан жана эт азыктары боюнча изилдөө иштерин жүргүзүштү. Билим берүүнүн заманбап моделин колдонуу менен улуттук тамак-аштарды илимий изилдеп, тамак-аштардын жасалышын, пайдалуулугун ата-энелерге көрсөтүштү.  Андан тышкары алардын тарыхын, философиясын, андагы химиялык, физикалык, биологиялык процесстерди, үнөмдөө математикасын түшүндүрүп бергени абдан кызыктуу болду. Жыйынтыгында  теориялык да, практикалык да билимдерге ээ болушту.

— Илимдердин айкалышында интеграцияланып, улуттук даамдардын келип чыгышы, тарыхы, курамы, касиеттери, даярдоо ыкмалары, колдонулган азыктардын өлчөмү сыяктуу изилдөөлөр окуу жылынын башынан тартып жүргүзүлгөн. Мында окуучулардын чыгармачылыгын жана аналитикалык ой жүгүртүүлөрүн өнүктүрүүгө багытталган иш-аракеттер көрүлгөн. Иш-чарага катышкан ата-энелердин пикиринде, STEAMди кыргыздын улуттук тамак-аштары аркылуу үйрөтүү кызыктуу гана болбостон, бул ыкма аркылуу окуучулар кыргыздын маданияты менен бирге тамак-аш даярдоо процесстерин, анын табигый жана биологиялык негиздерин, ден соолукка пайдалуу жактарын да үйрөнүп жетишкен, — дейт Ж.Сарыгулова.

Уюштуруучу мугалимдердин бири Акматов Искендер агайдын айтуусу боюнча, мындай иш-чара жыл сайын өткөрүлүп турат. Буга чейин боз үй жана «Манас» эпосу боюнча  уюштурулган.

Айдана МАМАТБЕРДИЕВА, «Кут Билим»