Салижан Жигитовдун эки китеби жарык көрдү

Адабиятчы Салижан Жигитовдун прозалык чыгармаларынан турган «Күн тууду» жана поэзиялык чыгармалары чогултулган «Шуулдаба терегим, теректерим…» деген эки китеби жарык көрдү.

Китептердин бет ачары 14-октябрда Бишкекте болуп өттү. Иш-чарага акын-жазуучулар, адабиятчылар жана Салижан Жигитовдун жакындары катышты.

Калемгердин «Күн тууду» аттуу повести 1977-жылы “Мектеп” басмасынан өзүнчө китеп болуп басылып чыккан.

2001-жылы журналист, публицист Алым Токтомушевдин «Салижан Жигитовдун сабактары» аттуу китеби жарык көргөн.

Кыргыздын көрүнүктүү  сынчысы, публицисти, сатириги, акыны жана коомдук ишмери Салижан Жигитов 1936-жылы 17-мартта Кыргыз Республикасынын (ал кездеги Кыргыз АССРинин) Ош облусуна караштуу Өзгөн районунда Көлдүк айылында туулган.

Ал 1995–96-жылдары «Азаттык» үналгысынын Бишкек бюросун да жетектеген.

Салижан Жигитов 2006-жылы 11-февралда Бишкек шаарында оорунун айынан каза болгон. Маркумдун сөөгү Бишкектеги «Ала-Арча» көрүстөнүнө коюлган.