ОШТУ ЭКИНЧИ ОРУНДУ ЭЭЛЕДИ

ОшТУнун GreenVUZ командасы Digital4Climate.KG хакатонунда байгелүү экинчи орунга жетишти. Бул тууралуу ОшТУнун басма сөз кызматы билдирди.

Маалыматта айтылгандай, Ош технологиялык университетинин GreenVUZ командасы Digital4Climate.KG хакатонунун финалдык этабында ийгиликтүү чыгып, 5 000 АКШ долларын утуп алды.

Өлкөнүн Баткен, Ош, Нарын, Ысык-Көл облустарынан жана Бишкек шаарынан келген 20 күчтүү команда Кыргызстандын УДАС 3.0 алкагындагы климаттык милдеттенмелерине ылайык санариптик чечимдерин сунуштаган эле. Финалга өткөн ОшТУнун GreenVUZ клубунун командасы «Tree Tracker» аттуу инновациялык долбоорун тааныштырды.

Долбоор шаардык жана аймактык деңгээлде жашыл дарактарды санариптик инвентаризациялоо, алардын абалын мониторинг жүргүзүү жана климаттын өзгөрүшүнө каршы аракеттерди күчөтүүгө багытталган.

GreenVUZ командасынын бул жетишкендиги жаштардын экологиялык инновацияларды иштеп чыгуудагы жогорку потенциалын жана ОшТУнун туруктуу өнүгүү багытындагы ишмердүүлүгүн дагы бир жолу далилдеди.

Айнагүл КАШЫБАЕВА,
“Кут Билим”