Мамлекеттик тилдеги котормо платформасы иштелип чыкты

Алгачкы жолу “translate.mamtil.gov.kg” котормо платформасы иштелип чыкты. Бул тууралуу Мамлекеттик тил жана тил саясаты боюнча улуттук комиссиянын маалымат кызматы билдирди.

Долбоордун негизги максаты – мамлекеттик тилдин кеңири жана эффективдүү колдонулушун камсыздоо.

Гугл Транслейт, Яндекс котормо сыяктуу иштеген улуттук платформа аркылуу кыргыз тилин башка тилдерге жана башка тилдерди кыргыз тилине которуу мүмкүнчүлүгү түзүлдү.

Төрага Мелис Мураталиевдин айтымында, программа 10 тилде которот: орус тили, англис тили, немис тили, испан тили, француз тили, италия тили, кытай тили, түрк тили, корей тили, жапон тили. Ошондой эле колдонуучуга которулган тексттин эки вариантын сунуштоо мүмкүнчүлүгүнө ээ. Биринчи варианты тексттин контексттик мазмунун берүүгө, экинчи варианты текстти сөзмө-сөз которууга негизделген.

“Кыргыз тили бүгүнкү күндө мамлекеттик тил статусуна ээ болуп, заманбап технологияларда да активдүү колдонулушу керек. Бул платформа аркылуу мамлекеттик тил санариптешүүнүн жаңы баскычына чыгат. Биздин максат – эне тилибизди колдоочу улуттук платформаны жаратуу менен анын глобалдык деңгээлде колдонулушуна жол ачуу”, – деди төрага.

Котормо платформасынын шилтемеси: https://translate.mamtil.gov.kg/translate/

Эльвира Какиева, “Кут Билим”