“Кыргыз жараны: тынчтык, инклюзия жана диалог” долбоору — келечек муунду бириктирген кадам

Ош шаарындагы №11 В. В. Терешкова атындагы жатак-мектебинде жаштарды биримдикке, толеранттуулукка жана диалог маданиятына үйрөтүүгө багытталган зор демилгелер жүрүп жатат. Бүгүнкү күндө «Кыргыз жараны: тынчтык, инклюзия жана диалог» долбоорунун алкагында мектепте жаңы мүмкүнчүлүктөр ачылып, окуучуларга заманбап социалдык көндүмдөрдү өнүктүрүүгө шарт түзүлүүдө.

«Кеменгер» тынчтык клубунун түзүлүшү

Долбоордун колдоосу менен мектептин балансында «Кеменгер» тынчтык клубу түзүлүп, анын курамына 15 активдүү окуучу кирди. Алар атайын жергиликтүү окуудан өтүп, көп түрдүүлүк, анын баалуулуктары, толеранттуулук, инклюзия жана форум-театр ыкмалары боюнча кеңири түшүнүктөргө ээ болушту.

Семинар учурунда окуучулар биргелешкен тапшырмаларды аткарып, жаңы досторду табышып, топто жана жуп болуп иштөөнү үйрөнүштү. Практикалык көнүгүүлөр алардын баарлашуу маданиятын, критикалык ой жүгүртүүсүн жана көйгөй чечүү жөндөмдөрүн бир топ өркүндөттү.

Форум-театр аркылуу коомдук көйгөйлөрдү чагылдыруу

Форум-театр ыкмасы окуучуларга коомдогу көйгөйлөрдү сахна аркылуу айтуу мүмкүнчүлүгүн берди. Алар тааныш-белгисиз социалдык темаларды жалпак сөз менен эмес, образ, эмоция, кыймыл аркылуу түшүндүрүп, көрүүчүлөр менен бирге чечүү жолдорун издей алышты. Бул ыкма балдардын чыгармачылыгын, лидерлик сапатын жана коомго болгон сезимтал мамилесин күчөттү.

Мектеп жетекчилигинин колдоосу

Клубдун түзүлүшүнө жана өнүгүүсүнө мектеп директору Ысмайылова Зуура Абжапаровна өзгөчө көңүл буруп, ар тараптуу колдоо көрсөтүп келет.
Анын айтымында:
«Билимди алып гана койбостон, жашоодо пайдаланып, коомго пайда алып келгенде гана биз келечекке ишенимдүү кадам таштайбыз. Тынчтык клубдары дал ушуну үйрөтөт».

Мектеп администрациясынын мындай мамилеси окуучулардын демилгелерин колдоого багытталган чоң стимул болуп саналат.

IPD коомдук фондунун салымы

Тынчтык клубдарынын ачылышында жана өнүгүүсүндө Тынчтык куруу жана өнүктүрүү институту (IPD) коомдук фонду, анын түптөөчүсү Улукбек Нурумбетовдун салымы зор. Алар жаштар үчүн мини-гранттарды жарыялап, жергиликтүү семинарларды, форум-театрларды жана башка интерактивдүү иш-чараларды өткөрүүгө мүмкүнчүлүк түзүшүүдө.

Долбоордун башкы максаты — окуучуларды толеранттуулукка, биримдикке, ынтымакка үндөө жана алардын коомдогу ордун терең түшүнүүгө көмөктөшүү.

Кантип тынчтык клубун ачса болот?

Тынчтык клубун түзүү — жөн эле жыйын гана эмес, бул чоң жоопкерчилик.
Эң биринчи кадам — максат коюу:

• жаштарды угуу
  • алардын талантын таануу
  • лидерлик сапаттарын өнүктүрүү
  • коомдун өнүгүшүнө салым кошуу

Мектептин жана мугалимдердин колдоосу, бир жооптуу координатордун бекитилиши- ийгиликтин негизги бөлүгү. Андан соң активдүү, лидерлик сапаттары бар окуучулар тандалып, клубдун өзөгүн түзөт.

Ал эми клубдун иши төмөнкү багыттарды камтыйт:
• толеранттуулук, тынчтык жана инклюзия боюнча тренингдер
• форум-театр чыгармалары
• лидерлик көндүмдөрдү өнүктүрүүчү практикалык тапшырмалар
• башка мектептердин клубдары менен жолугушуулар
• социалдык жана коомдук демилгелерди ишке ашыруу

Мындай иштердин натыйжасында окуучулар активдүү позицияга келип, коомго пайдалуу салым кошо алган жарандар болуп өсөт.

Келечекке караган кадам

«Кеменгер» тынчтык клубу окуучулардын чыгармачылыгын, жоопкерчилигин, лидерлик сапаттарын бекемдөөгө багытталган аракеттерди улантат. Клубдун мындан аркы пландары — шаардык деңгээлдеги форум-театрларды, фестивалдары, тематикалык социалдык акцияларды, жана башка мектептер менен биргелешкен иш-чараларды уюштуруу.

Мектеп жамааты мындай долбоорлордун зарылдыгын өзгөчө белгилейт. Себеби тынчтык маданияты, көп түрдүүлүктү урматтоо, диалогго даяр болуу — келечек муун үчүн эң маанилүү сапаттар.

Жыйынтык

Биз келечек муундун тынчтыкты сактаган, көп түрдүүлүктү сыйлаган, коомго өз салымын кошкон инсандар болуп өсүшүнө салым кошуп жатканыбызга сыймыктанабыз. «Кеменгер» клубунун ишмердүүлүгү -ынтымактуу коомду жаратууга болгон дагы бир чоң кадам.

Автор: “Кеменгер” тынчтык клубунун координатору Наркулова Асылгүл Аскаралиевна. Ош шаары,