ЭНЕЛЕР — БУЛ ЖАШООНУН СУЛУУЛАРЫ!

Каракөлдүк агартуучулар Энелер күнү менен ак жоолукчан апаларды, ак элечекчен энелерди куттукташты.

Шаардык билим берүү бөлүмүнүн чакан жамааты бардык энелерди Энелер күнү менен куттуктап, ар бирине узун өмүр, чың ден соолук каалашты. Майрамдын маанайыбы же энелердин улуулугубу, айтор жүрөктөн чыккан сөздөр өзүнөн-өзү кереметтүү ыр саптарына айланды.

Алымкан Мырзалиева, шаардык билим берүү бөлүмүнүн башчысы, педагогика илимдеринин кандидаты:

Чачымды тарасам да, тарабасам,
Күзгүгө карасам да, карабасам.
Бир гана апам мени танып кетпейт,
Бир гана апам мени таштап кетпейт.
Бир гана апам мени сүйүп турат,
Бир гана апам мага күлүп турат.

Зарема Бейшембиева, ШБББнүн башкы эсепчиси:

Жайбы-кышпы жайлоо жыттуу илеби,
Баласында бардык ою, тилеги.
Билбей жүрөм, кандай заттан бүттү экен?
Бизди тууган энелердин жүрөгү.

Таенем акыл чырагым,

Таенем өмүр булагым.

Таенем даркан сырларым,

Таенем урмат кыларым.

Венера Исмаилова, ШБББнүн жетектөөчү адиси:

Эне болот үй-бүлөдө нурун чачкан,

Эне болот жарыктыкта сени тапкан.
Эне болот бөпөлөтүп мээрим төгүп,
Эне болот ак бешикке бөлөп баккан.
Эненин асылдыгын дайым билгин,
«Жетишээр» деп даңазалап тим койбостон,
Кулча иштеп, ак сүтүн актай билгин.

Изат Молдомусаева, билим берүү бөлүмүнүн усулчусу (ортодо):

Үйүбүздүн кутусуң,
Кубанычым, апакем!
Эч нерсеге теңегис,
Асылымсың, апакем!

Алыста жүрөт неберең,
Унутпай сизди ар дайым.
Таенем менин таалайым,
Узун өмүр каалаймын!

Айгүл Каракозуева, усулдук кабинеттин башчысы:

Жашайт энелер,
Балдарын ойлоп.
Чебелектеп балдарын,
Баарынан коргоп.
Жашасын, апалар!
Баланын бактысына.
Апа бар дүйнөдө,
Жашоо башкача!

Энелер жашоонун жаратманы,
Энелер акыл-эстин санаттары.
Энелер ыйыктыгын даңктабаса,
Акындын жазылбастыр барактары.

Кыргызбай кызы Гульназира, ШБББнүн башкы адиси:

Сиз барда аалам бүтүн, дүйнө бүтүн.
Арнаган уулу үчүн бардык күчүн.
Апакем, дайым сизге ыраазымын,
Анткени биз барбыз, сиз бар үчүн!

Айзада Исабекова, ШБББнүн усулчусу:

Энелерди күнгө теңейм, айга теңейм,
Энемди жыпар жыттуу гүлгө теңейм.
Энелер чалкып турган мухит сымал,
Өйдө-ылдый чайпалбаган оңой менен!

(Айгүл Каракозуева кыздары менен)

А.Алибеков, «Кут Билим»