Enactus: AIU командасы алдыда

“Ала-Тоо” Эл аралык университетинин Enactus AIU командасы Enactus Kyrgyzstan уюму тарабынан Бириккен Улуттар Уюмунун Өнүгүү Программасы (UNDP) менен биргеликте уюштурулган DIGITAL4CLIMATE хакатонунун финалына катышты.

Финалдык этапта Кыргызстандын бардык аймактарынан тандалып алынган 22 мыкты стартап ат салышты. Конкурстун жыйынтыгы боюнча Enactus AIU командасы 3-орунду ээлеп, өз долбоорун ишке ашыруу үчүн 2000 АКШ доллары өлчөмүндөгү грантка ээ болду.

Алардын Zero Waste долбоору суу ресурстарынын деградациясы жана суу объектилеринин акырындап баткакка айланышы сыяктуу актуалдуу экологиялык көйгөйлөрдү чечүүгө багытталган. Команда инвазивдүү өсүмдүк түрлөрүн колдонуу менен калкып жүрүүчү фито-аралчалардын жардамы аркылуу суу объектилерин тазалоонун инновациялык ыкмасын сунуштайт.

Биз экологиялык демилгелерди студенттик алгачкы курстарынан баштап ишке ашырып, туруктуу чечимдерди киргизип, Кыргызстандын экологиялык жактан жоопкерчиликтүү келечегине салым кошуп жаткан студенттерибиз менен сыймыктанабыз.