ЭДИЛЬ БАЙСАЛОВ “СЕЙТЕК” УЛУТТУК БОРБОРУНА БАРДЫ

Кыргыз Республикасынын Министрлер Кабинетинин Төрагасынын орун басары Эдиль Байсалов Балдардын жана өспүрүмдөрдүн улуттук “Сейтек” борборуна барды. Ал борбордун имаратынын азыркы абалы менен таанышып, балдар жана жаштар үчүн өткөрүлүп жаткан сабактарга катышты.

“Сейтек” улуттук борбору — Кыргызстандын балдары менен жаштарынын чыгармачылык жана билим берүү потенциалын өнүктүрүүгө багытталган маанилүү мекеме. Бул жерде искусство, илим, спорт жана технология сыяктуу ар түрдүү багыттар боюнча сабактар өткөрүлөт.

Байсалов борбордун инфратүзүмүнүн абалына өзгөчө көңүл буруп, имаратты оңдоп-түзөө жана модернизациялоо маселелерин, ошондой эле жогорку деңгээлде сабактарды өткөрүү үчүн техникалык жабдууларды камсыз кылуу зарылдыгын белгиледи.

Министрлер Кабинетинин Төрагасынын орун басары бир нече класстарга кирип, бий, хореография жана башка тармактар боюнча өтүп жаткан сабактарга күбө болду. Ошондой эле мугалимдер жана окуучулар менен баарлашып, алардын жетишкендиктери, окуу шарттары жана келечектеги пландары менен кызыкты.

“ Балдардын жана өспүрүмдөрдүн улуттук “Сейтек” борбору — биздин жаш муун менен иштөөдөгү эң маанилүү борборлордун бири. Бул жерде Кыргызстандын келечектеги лидерлери, чыгармачыл инсандары жана жаңычылдары тарбияланат. Биздин милдет — аларга өз мүмкүнчүлүктөрүн толук ачып, өлкөнүн өнүгүшүнө салым кошуу үчүн мыкты шарттарды түзүү”, — деп баса белгиледи Эдиль Байсалов.

Ошондой эле борбордун кызматкерлерине жаш муунду тарбиялоого кошкон салымы үчүн ыраазычылыгын билдирип, “Сейтек” Кыргызстанда балдар жана өспүрүмдөрдүн таланттарын өнүктүрүүдөгү маанилүү борбор бойдон кала берээрине ишенимин билдирди.

Маалымат үчүн:

Балдардын жана өспүрүмдөрдүн улуттук “Сейтек” борбору өлкөнүн балдары менен жаштарынын ар тараптуу өнүгүүсүн камсыз кылуу максатында түзүлгөн. Жыл сайын бул жерде миңдеген окуучулар билим алышат, ал эми программалардын ар түрдүүлүгү ар бир балага өзүнө ылайыктуу багытты тандоого мүмкүнчүлүк берет.

Гүлнара АЛЫБАЕВА, “Кут Билим”