Үч жашка чейинки балдарга жаңы жөлөкпул төлөнөт

Кыргыз Республикасынын Президенти Садыр Жапаров үч жашка чейинки бардык балдарга арналган жаңы мамлекеттик жөлөкпул киргизүү тууралуу Жарлыкка кол койду. “Бала ырысы” деп аталган ай сайын берилүүчү бул төлөм 2026-жылдын 1-июлунан тартып ишке кирет.

Жаңы жөлөкпул үй-бүлөнүн кирешесине карабастан, үч жашка чейинки ар бир балага берилет. Анын көлөмү ай сайын 1200 сомду түзөт. Президент бул чечим жарандардын көптөгөн кайрылууларына жооп катары кабыл алынганын жана баланын өнүгүүсүнүн эң маанилүү мезгилинде үй-бүлөлөрдү колдоого багытталганын белгиледи.

Президент эмне деди

Мамлекет башчысы мамлекеттик жөлөкпулдар системасында бир катар көйгөйлөр бар экенин айтып, көптөгөн энелер жардам алууда бюрократиялык тоскоолдуктарга туш болуп жатканын белгиледи. Анын айтымында, айрыкча ымыркай балдарга тиешелүү учурда мындай жагдайлар жол берилгис.

“Адамдын негизги дене тарбиялык жана акыл-эс жөндөмдөрү жашоосунун алгачкы жылдарында калыптанат. Ошондуктан ушул мезгилде үй-бүлөлөргө мамлекет тарабынан колдоо көрсөтүү өтө маанилүү”, — деп белгиледи президент.

“Бала ырысы” жөлөкпулу эмнени максат кылат

Президент Министрлер Кабинетине жаңы жөлөкпул системасын иштеп чыгып, аны ишке киргизүүнү тапшырды. Анын айтымында, мамлекет үчүн эң башкысы — чындап муктаж болгон бир да бала колдоосуз калбашы.

“Кээ бирөөлөр бул жерде кыянаттык менен пайдалануу болушу мүмкүн деп айтышы мүмкүн. Бирок муктаж болбогондорго бир нече ашыкча жөлөкпул төлөнсө да, чындап муктаж болгон бир да бала жардамсыз калбашы керек”, — деди мамлекет башчысы.

Кыргызстанда канча бала бар

Кыргыз Республикасынын Улуттук статистика комитети берген маалыматка ылайык, өлкөдө үч жашка чейинки болжол менен 445 миң бала жашайт.

Жаңы социалдык колдоо чарасы балдар арасындагы жакырчылыкты азайтууга жана баланын өнүгүүсүнүн эң маанилүү мезгилинде үй-бүлөлөргө кепилденген жардам көрсөтүүгө багытталган.

Нурлан Кыдыков, “Кут билим”