Билим жарманкеси: инновациялар жана алдыңкы тажрыйба

Бүгүн көл жээгинде Россия менен Кыргызстандын билим берүүдөгү инновациялык жетишкендиктеринин жарманкеси башталды. Иш-чара Кыргызстандын педагогдорунун август кеңешмесинин алкагында өтүүдө.

«Биз бүгүн билим берүү аркылуу достукту бекемдеп, мамилебизди тереңдетишибиз керек», — деди министр Догдургүл Кендирбаева жарманкенин ачылышында.

Эки күнгө созулган бул жарманкеде эки өлкөнүн билим берүү уюмдарынын инновациялык жетишкендиктерин чагылдырган көргөзмө, мастер-класстар, “Технологиялык лидерликке жетишүүдөгү билим берүүнүн орду”, “Педагогикалык кадрларды даярдоо чөйрөсүндөгү инновациялар” жана “Билим берүү процессиндеги санарип чечимдер” деген секцияларда кызуу талкуулар өтүүдө.

Кыргызстандын билим берүү тармагы масштабдуу өзгөрүү алдында турганда, мугалимдердин салтка айланган Август конференциясынын мындай масштабдуу иш-чаралар менен өтүп жатканы Кыргызстан үчүн өтө маанилүү.

Жарманкеде Кыргыз мамлекеттик техникалык университети бир канча долбоор менен келген. Анын бири Майлы-Суу шаарындагы автобекетинин макети.

Ал эми Ош мамлекеттик университети жарманкеге студенттер тарабынан кыргыз колоритиндеги чоподон жасалган сувенир, белдемчи, этночапан жана мындан башка жети долбоорду алып келген.

Улуттук агрардык университетинин окумуштуулары тарабынан иштелип чыккан дары-дармектер, жер семирткичтер жана малина, помидор сыяктуу жашылча жемиштердин мол түшүм бере турган түрүн көрсөттү.

Кыргыз улуттук университеттин студенттери стартап долбоорлорун сунуштады.

Жарманкеде Кыргызстандын 7 дубанынан мугалимдер, мектеп директорлору, жогорку окуу жайлардын өкүлдөрү болду. Россиядан билим берүү тармагындагы 150дөн ашык уюмдун өкүлү келип, университеттери тууралуу маалымат беришти.